निष्पक्ष र विश्वसनीय खबरको सँगालो 
Khabar Punja
२९ बैशाख २०८३, बुधबार
दमौली, १९ फागुन । फागुन २१ गते हुने प्रतिनिधिसभा सदस्य निर्वाचनका लागि तनहुँमा सामग्री बुझेर कर्मचारी मतदान केन्द्र पुगेका छन् । तनहुँ क्षेत्र नम्बर १ र क्षेत्र नम्बर २ का कर्मचारी सोमबार निर्वाचन सामग्री बुझेर सम्बन्धित मतदान केन्द्र पुगेका हुन् ।
दमौलीस्थित जिल्ला निर्वाचन कार्यालय तनहुँबाट क्षेत्र नम्बर १ का मतदान केन्द्रका लागि आवश्यक सामग्री वितरण गरिएको कार्यालय प्रमुख विकास लम्सालले जानकारी दिए। यस्तै शुक्लागण्डकी नगरपालिकास्थित निर्वाचन अधिकृतको कार्यालयबाट क्षेत्र नम्बर २ अन्तर्गतका मतदान केन्द्रका लागि सामग्री वितरण गरिएको छ ।
जिल्ला निर्वाचन कार्यालयबाट निर्वाचन सामग्री वितरण गरिएको छ भने मुख्य निर्वाचन अधिकृतको कार्यालय र निर्वाचन अधिकृतको कार्यालयबाट मतपत्र वितरण गरिएको लम्सालले बताए।
जिल्लामा एक सय ४४ मतदान स्थल र तीन सय नौ मतदान केन्द्र छन् । क्षेत्र नम्बर १ मा ६९ मतदानस्थल र एक सय ५३ मतदान केन्द्र तथा क्षेत्र नम्बर २ मा ७५ मतदानस्थल र एक सय ५६ मतदान केन्द्र रहेका छन् ।
निर्वाचनका लागि तनहुँमा दुई लाख ५४ हजार तीन सय ९७ मतदाता कायम भएका छन् । त्यसमध्ये पुरुषको सङ्ख्या एक लाख २३ हजार चार सय ९१ र महिलाको सङ्ख्या एक लाख ३० हजार नौ सय छ जना रहेको छ ।
दुई प्रतिनिधिसभा निर्वाचन क्षेत्र रहेको यहाँ तनहुँ क्षेत्र नम्बर १ तर्फ एक लाख २६ हजार आठ सय ८२ र र क्षेत्र नम्बर २ तर्फ एक लाख २७ हजार पाँच सय १५ मतदाता कायम भएका छन् । क्षेत्र नम्बर १ मा पुरुषको सङ्ख्या ६१ हजार सात सय ७८ र महिलाको सङ्ख्या ६५ हजार एक सय चार रहेको छ । क्षेत्र नम्बर २ मा पुरुषको सङ्ख्या ६१ हजार सात सय १३ र महिलाको सङ्ख्या ६५ हजार आठ सय दुई रहेको छ ।
क्षेत्र नम्बर १ तर्फ व्यास नगरपालिका, भानु नगरपालिका, बन्दीपुर गाउँपालिका, आँबुखैरेनी गाउँपालिका र देवघाट गाउँपालिका पर्दछ । क्षेत्र नम्बर २ तर्फ शुक्लागण्डकी नगरपालिका, भिमाद नगरपालिका, म्याग्दे गाउँपालिका, ऋषिङ गाउँपालिका, घिरिङ गाउँपालिका र व्यास नगरपालिकाको वडा नम्बर ५ र ६ पर्दछ ।
