निष्पक्ष र विश्वसनीय खबरको सँगालो 
Khabar Punja
१८ चैत्र २०८२, बिहीबार
दमौली, २८ फागुन । तनहुँको सदरमुकाम दमौली बजार क्षेत्रमा खाना पकाउने ग्यास अभाव भएको भन्दै सामाजिक अभियन्ता सुदीप गफ्फार र कृष्ण प्रजापतिले बिहीबार साङ्केतिक विरोध जनाएका छन् ।
व्यास नगरपालिका–३ प्रशासन चोकमा खाली ग्यास सिलिन्डर राखेर उनीहरुले करिब एक घण्टा विरोध प्रदर्शन गरेका हुन्। स्थानीय बजारमा ग्यास नपाउँदा सर्वसाधारणको दैनिकी प्रभावित भएको भन्दै उनीहरुले ध्यानाकर्षण गराएका हुन् ।
अभियन्ता गफ्फारले ग्यास व्यवसायीले कृत्रिम अभाव सिर्जना गरेको आरोप लगाए । “नेपाल आयल निगमले देशभर ग्यास अभाव नभएको बताइरहेको छ, तर यहाँका व्यापारीले ग्यास छैन भन्दै उपभोक्तालाई फर्काइरहेका छन्,” उनले भने ।
बजारमा ग्यास उपलब्ध नभएपछि विशेषगरी दैनिक ज्यालादारी गरेर जीवनयापन गर्ने परिवारहरू बढी समस्यामा परेका छन्। “ग्यास नपाउँदा भुइँमान्छेको दैनिकी नै प्रभावित भएको छ,” उनले भने ।
विरोध कार्यक्रममा खाली ग्यास सिलिन्डर राखेर समस्या समाधानका लागि सम्बन्धित निकायको ध्यानाकर्षण गराइएको थियो।
अभियन्ता गफ्फारले स्थानीय तह र जिल्ला प्रशासनले समस्या समाधानका लागि आवश्यक पहल नगरेको भन्दै असन्तुष्टि व्यक्त गरेका छन् । “ग्यास अभावबारे नागरिकले पटक–पटक गुनासो गरे पनि स्थानीय तह र प्रशासन मौन बसेको छ,” उनको भनाइ छ।
उनले उपभोक्तालाई सहज रूपमा ग्यास उपलब्ध गराउने व्यवस्था मिलाउन र कृत्रिम अभाव सिर्जना गर्ने व्यवसायीमाथि अनुगमन गर्न सम्बन्धित निकायसँग माग गरे ।
