निष्पक्ष र विश्वसनीय खबरको सँगालो 
Khabar Punja
८ बैशाख २०८३, बुधबार
दमौली, ८ वैशाख । तनहुँको व्यास नगरपालिका–१४ केशवटारमा मंगलबार एकीकृत घुम्ती शिविर सञ्चालन गरिएको छ । नगरपालिकाको आयोजनामा भएको शिविरको उद्घाटन नगर प्रमुख वैकुण्ठ न्यौपानेले गरे ।
शिविर उद्घाटन गर्दै प्रमुख न्यौपानेले जनताको सहजताका लागि वडामै पुगेर सेवा प्रदान गर्ने उद्देश्यले यस्तो कार्यक्रम सञ्चालन गरिएको बताए । उनले नगरबासीलाई घर नजिकैबाटै विभिन्न सरकारी सेवा उपलब्ध गराउने लक्ष्यका साथ एकीकृत घुम्ती शिविरलाई प्रभावकारी बनाइएको उल्लेख गरे ।
कार्यक्रममा उपप्रमुख इन्दिरा दरैले यस्ता शिविरले सेवाग्राहीलाई समय र खर्च दुवै बचत हुने बताउँदै नागरिकमैत्री सेवा प्रवाहमा टेवा पुग्ने धारणा राखिन् ।
शिविरमार्फत नगरपालिकाबाट प्रदान गरिने विभिन्न सेवाहरु एकै स्थानबाट उपलब्ध गराइएको छ । जस अन्तर्गत व्यक्तिगत घटना दर्ता, सामाजिक सुरक्षा भत्ता सम्बन्धी सेवा, स्वास्थ्य परीक्षण, कृषि तथा पशु सेवा, महिला तथा बालबालिका सम्बन्धी परामर्श, राजस्व संकलन लगायतका सेवा प्रदान गरिएको नगरपालिकाले जनाएको छ ।
स्थानीय बासिन्दाले घरदैलोमै सेवा पाउँदा खुसी व्यक्त गरेका छन् । यस्ता कार्यक्रमले विशेषगरी ज्येष्ठ नागरिक, अपाङ्गता भएका व्यक्ति तथा टाढा रहेका बस्तीका नागरिकलाई प्रत्यक्ष लाभ पुगेको बताइएको छ ।
