निष्पक्ष र विश्वसनीय खबरको सँगालो 
Khabar Punja
१८ जेष्ठ २०८३, मंगलवार
दमौली, १९ जेठ । जनभावना नेवाः खल मिसाः पुच दमौलीको आयोजना तथा व्यास नगरपालिका–३ वडा कार्यालयको आर्थिक सहयोगमा मकैको खोस्टाबाट विभिन्न सामग्री निर्माण गर्ने सीपमूलक तालिम मङ्गलबारदेखि सुरु भएको छ । जेठ २३ गतेसम्म सञ्चालन हुने उक्त तालिममा ४० जना महिलाको सहभागिता रहेको छ ।
व्यास नगरपालिका–३ का वडाध्यक्ष अनुप रानाले महिला लक्षित तालिमलाई व्यवहारमा उतार्दै उद्यमशीलतासँग जोडिन आग्रह गरे । तालिम लिएपछि त्यसलाई उत्पादन र व्यवसायमा रूपान्तरण गर्नुपर्ने उल्लेख गर्दै उनले उद्यमीले उत्पादन गरेका वस्तुको बजारीकरणका लागि वडा कार्यालयले आवश्यक सहयोग गर्ने प्रतिबद्धता व्यक्त गरे ।
व्यास नगरपालिकाका संस्थापक नगर प्रमुख ताराप्रसाद श्रेष्ठले तालिम लिएर पनि व्यवहारमा नउतार्ने प्रवृत्तिको अन्त्य गर्नुपर्नेमा जोड दिए ।
महिला उद्यमी सङ्घ गण्डकीकी उपाध्यक्ष निर्मला मल्लले खेर जाने मकैको खोस्टालाई उपयोग गरी आत्मनिर्भर बन्न सकिने बताइन् । महिलाहरू घरायसी काममा मात्र सीमित नभई आर्थिक गतिविधिमा सक्रिय हुनुपर्ने र महिला आत्मनिर्भर भए देशको समग्र विकासमा टेवा पुग्ने उनकाे भनाइ थियाे ।
वडा सचिव सावित्री आचार्यले वडा कार्यालयले विभिन्न समुदायलाई लक्षित गरी नियमित रूपमा सीपमूलक तालिम सञ्चालन गर्दै आएको जानकारी दिँदै यस्ता कार्यक्रमले महिलालाई आत्मनिर्भर बन्न सहयोग पुग्ने बताए ।
जनभावना नेवाः खल मिसाः पुचकी अध्यक्ष रश्मिला ताम्राकारले महिलालाई घरायसी काममा मात्र सीमित नराखी उद्यमशीलतासँग जोड्ने उद्धेश्यले तालिम आयोजना गरिएको जानकारी दिइन् ।
जनभावना नेवाः खल मिसाः पुचकी सचिव सरिता श्रेष्ठले तालिममा वडाभित्रका आमा समूह, टोल समिति, जनभावना नेवाः खल मिसाः पुचका सदस्यहरू सहभागी रहेको जानकारी दिइन् । तालिममा विमल श्रेष्ठ र सुशीला श्रेष्ठले प्रशिक्षण प्रदान गर्नेछन् ।
