निष्पक्ष र विश्वसनीय खबरको सँगालो 
Khabar Punja
२ असार २०८३, बुधबार
काठमाडाै ३ असार । अर्जेन्टिनाका कप्तान तथा विश्व फुटबलका सुपरस्टार लियोनेल मेस्सीले फिफा विश्वकप २०२६ अन्तर्गत अल्जेरियाविरुद्धको खेलमा ऐतिहासिक प्रदर्शन गर्दै एकै खेलमा ६ वटा महत्वपूर्ण कीर्तिमान आफ्नो नाममा लेखाएका छन्।
समूह ‘जे’ अन्तर्गत भएको खेलमा अर्जेन्टिनाले अल्जेरियालाई ३–० गोल अन्तरले पराजित गर्दा मेस्सीले ह्याट्रिक गर्दै टोलीलाई शानदार जित दिलाएका थिए। उक्त खेलसँगै उनले विश्वकप इतिहासका विभिन्न कीर्तिमानहरू बराबरी तथा नयाँ कीर्तिमान कायम गरेका हुन्।
अल्जेरियाविरुद्ध मैदान उत्रिएसँगै मेस्सी विश्वकपका ६ संस्करण खेल्ने विश्वकै पहिलो फुटबलर बने। उनले सन् २००६ मा जर्मनीमा आयोजित विश्वकपबाट सुरु गरेको यात्रा सन् २०२६ सम्म निरन्तरता दिएका छन्। यसअघि कुनै पनि खेलाडीले ६ वटा विश्वकप संस्करणमा सहभागिता जनाउन सकेका थिएनन्।
त्यसैगरी, अल्जेरियाविरुद्ध गरेको ह्याट्रिकसँगै मेस्सीको विश्वकप गोल संख्या १६ पुगेको छ। यससँगै उनले जर्मनीका पूर्वस्ट्राइकर मिरोस्लाभ क्लोजेको विश्वकप इतिहासमा सर्वाधिक १६ गोलको कीर्तिमान बराबरी गरेका छन्। अब मेस्सी विश्वकप इतिहासका एकल सर्वाधिक गोलकर्ता बन्न केवल एक गोल टाढा रहेका छन्।
विश्वकप करियरमा पहिलो पटक ह्याट्रिक गर्न सफल भएका मेस्सीले अर्को दुर्लभ उपलब्धि पनि हासिल गरे। ३८ वर्षको उमेरमा ह्याट्रिक गर्दै उनी विश्वकप इतिहासमा सबैभन्दा बढी उमेरमा ह्याट्रिक गर्ने खेलाडी बनेका छन्।
अल्जेरियाविरुद्धको खेल मेस्सीको अर्जेन्टिनाका लागि २००औँ अन्तर्राष्ट्रिय खेल पनि थियो। दुई दशकभन्दा लामो अन्तर्राष्ट्रिय करियरमा उनले अर्जेन्टिनाका लागि अर्को ऐतिहासिक कोशेढुङ्गा पार गरेका हुन्।
यस्तै, मेस्सी विश्वकपका पाँच फरक संस्करणमा गोल गर्ने खेलाडीको सूचीमा थप मजबुत रूपमा स्थापित भएका छन्। उनले २००६, २०१४, २०१८, २०२२ र २०२६ संस्करणमा गोल गर्दै आफ्नो निरन्तर उत्कृष्टता प्रमाणित गरेका छन्।
विश्वकप विजेता कप्तान समेत रहेका मेस्सीको यो प्रदर्शनलाई फुटबल इतिहासकै स्मरणीय क्षणमध्ये एक मानिएको छ। विश्वभरका फुटबल समर्थक र विश्लेषकहरूले उनको प्रदर्शनको प्रशंसा गर्दै उनलाई आधुनिक फुटबलका महानतम खेलाडीमध्ये एकको रूपमा पुनः स्थापित गरेको बताएका छन्।
अर्जेन्टिनाले प्रतियोगितामा विजयी सुरुआत गर्दा मेस्सी व्यक्तिगत रूपमा पनि नयाँ इतिहास रच्न सफल भएका छन्। आगामी खेलमा गोल गर्न सके उनी विश्वकप इतिहासका एकल सर्वाधिक गोलकर्ता बन्ने सम्भावना रहेको छ।
