Khabar Punja

दमौली, १७ साउन । हिमालका साहसी पुत्र तथा विश्व कीर्तिमानी नेपाली पर्वतारोही निर्मल पुर्जा (निम्स दाइ) को असामयिक निधनले यतिबेला सिंगो राष्ट्र शोकमा डुबेको छ। ब्रोड पिक आरोहणका क्रममा आएको हिमपहिरोमा परी उनले जीवन गुमाएको दुःखद खबरले नेपाली मात्र होइन, विश्वभरका पर्वतारोहणप्रेमीहरूको मन पनि स्तब्ध बनेको छ।

यसैबीच, तनहुँको आँबुखैरेनीका चित्रकार पवन नेपालीले निम्स दाइप्रति भावपूर्ण श्रद्धाञ्जली अर्पण गर्दै उहाँको सम्झनामा विशेष कलाकृति सिर्जना गरेका छन्। क्यानभासमा उतारिएको यो चित्र केवल एउटा अनुहारको प्रतिरूप होइन, साहस, समर्पण, देशप्रेम, नेतृत्व र असम्भवलाई सम्भव बनाउने अदम्य आत्मविश्वासको जीवन्त अभिव्यक्ति हो।

चित्रकार पवन नेपालीका अनुसार निम्स दाइ नेपालीहरूको मात्र होइन, संसारभरका युवाका प्रेरणाका स्रोत थिए। उनले विश्व पर्वतारोहणमा नेपालको पहिचानलाई नयाँ उचाइमा पुर्‍याउँदै नेपाली पर्वतारोहीहरूको क्षमता र योगदानलाई अन्तर्राष्ट्रिय स्तरमा स्थापित गर्न अतुलनीय भूमिका खेले । उनको साहस, आत्मविश्वास र देशप्रतिको समर्पण सधैं प्रेरणाको स्रोत बनिरहने विश्वास नेपाली व्यक्त गरेका छन्।

“शरीरले हामीलाई छाड्नुभयो, तर उहाँका साहसिक पाइला, कीर्तिमान र प्रेरणाले कहिल्यै साथ छोड्ने छैनन्,” चित्रमार्फत पवन नेपालीले व्यक्त गरेको भाव यही हो। चित्रमा देखिएको दृढ अनुहार, हिमालप्रतिको प्रेम र आँखा भरिएको आत्मविश्वासले निम्स दाइको व्यक्तित्वलाई जीवन्त रूपमा प्रस्तुत गरेको छ।

पवन नेपालीले बनाएको यो कलाकृति एउटा चित्र मात्र होइन, हिमालका अमर योद्धाप्रति व्यक्त गरिएको गहिरो सम्मान, माया र कृतज्ञताको प्रतीक बनेको छ।