निष्पक्ष र विश्वसनीय खबरको सँगालो 
Khabar Punja
२० श्रावण २०८३, बिहीबार
दमौली, २१ साउन । राष्ट्रिय स्वतन्त्र पार्टी (रास्वपा) तनहुँले राष्ट्रिय परिचयपत्र बनाउन जिल्ला प्रशासन कार्यालयमा बिहानैदेखि लाग्ने भिड व्यवस्थापन, ग्यास आपूर्तिको सहजता तथा भूमि आयोगसँग सम्बन्धित गुनासाका विषयमा प्रमुख जिल्ला अधिकारी शिवलाल तिवारीको ध्यानाकर्षण गराएको छ।
रास्वपा तनहुँका सभापति विश्व बास्तोलाको नेतृत्वमा प्रमुख जिल्ला अधिकारीसँग भेट गर्दै राष्ट्रिय परिचयपत्र बनाउन सेवाग्राहीको अत्यधिक भीड हुने भएकाले सेवा व्यवस्थापन प्रभावकारी बनाउन तथा शनिबार र आइतबार समेत सेवा सञ्चालन गर्न आग्रह गरेका थिए। प्रमुख जिल्ला अधिकारीले यस विषयमा आवश्यक व्यवस्थापन सुरु गर्ने जानकारी दिएको रास्वपा व्यास नगर सभापति चुडामणि दाहालले बताए ।
भेटका क्रममा भूमि आयोगसँग सम्बन्धित गुनासा तथा एलपी ग्यासको सहज आपूर्तिका विषयमा पनि छलफल भएको थियो। प्रमुख जिल्ला अधिकारीले दुवै विषयमा आवश्यक समन्वय गरी छिट्टै समाधानको पहल गरिने जानकारी दिएको रास्वपा तनहुँले जनाएको छ।
