निष्पक्ष र विश्वसनीय खबरको सँगालो 
Khabar Punja
६ मंसिर २०८१, शुक्रबार
तनहुँ : सिन्धुलीगढी विजयोत्सवको अवसरमा तनहुँको जस्पुरस्थित वंशु गुरुङका सन्तानहरुले वंशु गुरुङको सम्मानमा शालिकमा माल्यार्पण गरेका छन् ।
वंशु गुरुङ स्मृति प्रतिष्ठानको आयोजनामा भएको सम्मान कार्यक्रममा शुक्लागण्डकी नगरपालिकाका प्रमुख किसान गुरुङ, १२ नम्बर वडाध्यक्ष मनराज गुरुङ लगायत जनप्रतिनिधि समेतको उपस्थिति हुनुहुन्थ्यो ।
सिन्धुलीगढीमा विश्वमै पहिलोपटक १८२४ साल असोज १५ गते अंग्रेज फौजलाई पराजित गरेको दिनको स्मरणमा विजयोत्सव मनाइएको हो । बिहीबार सिन्धुली, काठमाडौं र तनहुँको जस्पुरमा विजयोत्सव मनाइएको छ । सिन्धुलीगढीको युद्धमा सिकारी सरदार वंशु गुरुङले अंग्रेज फौजको ढाड हानेर तितरवितर पारेकाले उनको योगदान महत्वपूर्ण रहेको स्मरण गरिँदै आएको छ ।
जसपुरमा आयोजित कार्यक्रममा नगरपालिकाका प्रमुख किसान गुरुङ लगायतले जस्पुरमा निर्माण भएको वंशु गुरुङको प्रतिमामा माल्यार्पण गरिएको थियो ।
कार्यक्रममा बोल्दै नगर प्रमुख गुरुङले वंशु गुरुङ लगायत सपुतहरुले सिन्धुलीगढीको युद्धमा विजय हासिल गरी गौरव बढाएकामा सम्मान व्यक्त गर्नुभयो । वंशु गुरुङ लगायत वीरहरुको योगदान अतुलनीय रहेको भन्दै राष्ट्रिय विभूतिको सम्मान दिनुपर्ने गुरुङले माग गर्नुभयो ।
राष्ट्र जोगाउने व्यक्ति वंशु गुरुङको शालिक आफ्नो वडामा बन्नुले गौरव बढाएको भन्दै शुक्लागण्डकी १२ का वडाध्यक्ष मनराज गुरुङले वंशु गुरुङ प्रतिष्ठानका लागि वडाको तर्फबाट पनि सहयोग गरिने बताउनुभयो ।
पोखरा महानगरपालिकाका १६ नम्बर वडा सदस्य राजेश गुरुङले वीरगाथा बोकेका व्यक्तित्व, आफ्नो पुर्खाको शालिक जस्पुरमा स्थपना गर्न पाउँदा गरिमा बढेको बताउनुभयो । गत वर्ष जस्पुरमा स्थापना गरिएको प्रतिमा गण्डकी प्रदेशका मुख्यमन्त्री पृथ्वीसुब्बा गुरुङले अनावरण गर्नुभएको थियो ।
प्रतिष्ठानका अध्यक्ष लालजङ थापा, सल्लाहकार नरबहादुर गुरुङ, सदस्य विनु गुरुङ लगायतले पनि बोल्नुभएको थियो ।
