निष्पक्ष र विश्वसनीय खबरको सँगालो 
Khabar Punja
१३ मंसिर २०८१, शुक्रबार
दमाैली । स्थानीय तह निर्वाचन अन्तर्गत तनहुँमा शुक्रबार भएको मतगणना सकिएपछि मतपेटिका ल्याउने क्रम सुरु भएको छ । जिल्लाका दशवटै पालिकाका दुई सय ९७ मतदान केन्द्रमा मतदान सकिएपछि निर्वाचन अधिकृतको कार्यालयमा मतपेटिका ल्याउन सुरु भएको हो ।
जिल्लाका दशवटै पालिकामा मतदान सकिएको र खसेको मतको विवरण आउन बाँकी रहेको जिल्ला निर्वाचन कार्यालय तनहुँका प्रमुख हरिप्रसाद ढकालले जानकारी दिए ।
व्यास नगरपालिकाका १४ वटै वडाका मतदान केन्द्रबाट मुख्य निर्वाचन अधिकृतको कार्यालय दमौलीमा मतपेटिका ल्याइएको मुख्य निर्वाचन अधिकृत हरिशचन्द्र ढुङ्गानाले जानकारी दिए ।
देवघाट गाउँपालिकाका ग्रामीण भेगका वडाका मतदान केन्द्रबाट पनि मतपेटिका निर्वाचन अधिकृतको कार्यालयमा आउने क्रम जारी रहेको निर्वाचन अधिकृत थमनसिंह थापाले जानकारी दिए । थापाका अनुसार देवघाटमा १२ हजार आठ सय १५ मध्ये करिब आठ हजार मत खसेको छ ।
म्याग्दे गाउँपालिकामा १८ हजार एक सय पाँच मतदातामध्ये ११ हजार नौ सय ४३ मत खसेको छ । घिरिङ गाउँपालिकामा १४ हजार छ सय ७६ मतदातामध्ये आठ हजार सात सय १६ मत खसेको निर्वाचन अधिकृत किर्तनराज पौडेलले जानकारी दिए । सबै मतपेटिका निर्वाचन अधिकृतको कार्यालयमा आएपछि सर्वदलीय बैठक राखेर मतगणना सुरु गरिने पौडेलले बताए ।
आँबुखैरेनी गाउँपालिकामा १३ हजार छ सय ३१ मतदातामध्ये नौ हजार दुई सय ७९ मत खसेको निर्वाचन अधिकृत चिरञ्जीवि पौडेलले जानकारी दिए । त्यस्तै बन्दीपुर गाउँपालिकामा १५ हजार छ सय ३८ मतदातामध्ये १० हजार एक सय ९५ मत खसेको छ ।
