निष्पक्ष र विश्वसनीय खबरको सँगालो 
Khabar Punja
१३ आश्विन २०८१, सोमबार
दमाैली । आन्द्राको समस्याबाट पीडित भइ उपचारमा कठिनाइ भएकी म्याग्दे गाउँपालिका–१ बाख्रे निवासी सलिना गुरुङको उपचारका लागि युवा अभियान्ता सुदीप गफ्फारको सक्रियतामा रु ३५ हजार बढी आर्थिक सङ्कलन भएको छ ।
दमौली बजारका विभिन्न ठाउँमा सर्वसाधारणलाई दही चिउरा खुवाएर शुक्रबार र शनिबार गरी रु ३५ हजार तीन सय २५ सङ्कलन भएको हो ।
शुक्रबार रु २० हजार र शनिबार रु १५ हजार सङ्कलन भएको उनले जानकारी दिए । देउराली नगर आमा समूहले एकमुष्ट रु चार हजार एक सय ५० सहयोग गरेको थियो ।
त्यस्तै शनिबार व्यास नगरपालिका–३ अनसनचौतारीमा सर्वसाधारणलाई दही चिउरा खुवाएर रु ११ हजार बढी सङ्कलन भएको छ । उनले भने, “असार १५ मा दही चिउरा खाने प्रचलनलाई हामीले पीडितको राहत सङ्कलनसँग जोडेका हौ । दही चिउरा खानेले स्वतस्फूर्त रुपमा सकेको सहयोग गर्नुभएको छ ।” सङ्कलित रकम केही दिनमै पीडितको घरमा पुगेर हस्तान्तरण गरिनेछ ।
गफ्फारको अभियानका लागि दि नेक्स्ट एजुकेशन कन्सल्टेन्सी दमौली शाखा, र्याफल्स कन्सल्टेन्सीले पनि सहयोग गरेका छन् ।
