Khabar Punja

दमौली, १ चैत । तनहुँको शुक्लागण्डकी नगरपालिका–९ स्थित तालवेसी माध्यमिक विद्यालयले व्यावहारिक शिक्षासँगै प्रयोगात्मक सीप सिकाउन थालेपछि यहाँका विद्यार्थी आत्मनिर्भर बन्न थालेका छन् । विद्यालयका विद्यार्थी पछिल्लो समय लोकबाजामा आत्मनिर्भर बन्न थालेका हुन् ।

विद्यालयले पछिल्लो समय विद्यार्थीहरुको क्षमतालाई पहिचान गर्दै लोक संस्कृति संरक्षण गर्ने उद्धेश्यले नौमती बाजाको व्यवस्थापन गरेपछि विद्यार्थी उत्साहित बनेका छन् ।

कक्षा ६ देखि ८ सम्मका विद्यार्थीको सक्रिय सहभागितामा विद्यालयमा तालवेसी बाजा समूह गठन गरिएको विद्यालयका प्रधानाध्यापक धु्रव वाग्लेले जानकारी दिए । विद्यालयको सांस्कृतिक, शैक्षिक एवं अन्य शुभकार्यमा समेत विद्यार्थीले नौमती बाजा बजाउन थालेको उनले बताए । उनले भने, “व्यावहारिक शिक्षासँगै प्रयोगात्मक सीप सिकाएपछि विद्यार्थी नौमती बाजा बजाउन सक्ने भएका छन् । विद्यार्थीको प्रतिभा देखेर अभिभावक समेत दङ्ग छन् ।”

कक्षा ७ का विद्यार्थी सुक बहादुर विकको संयोजकत्वमा कक्षा ७ का विद्यार्थीहरु सुसन सुनार, सिजन विक, कृष्ण सुनार, सुदिप बैदास, निशान थापा र कक्षा ८ का विद्यार्थीहरु रुविन बैदास, अर्विन परियार र प्रसुन पौडेल रहेको तालवेसी बाजा क्लव गठन भएको छ ।

सधैंै किताव मात्र पढ्ने र लेख्ने गर्दा सिर्जनशिल हुन नसकेको बताउँदै विद्यालयले बाजा व्यवस्था गरेपछि आफूलाई आवश्यक पर्ने सामान्य कापी, कलम किन्ने खर्च समेत व्यवस्थापनमा सहजता भएको बाजामा संलग्न विद्यार्थी अर्विन परियारले बताए । उनले भने, “सानैदेखि वाद्यवादन क्षेत्रमा रमाउने इच्छा विद्यालयले पूरा गराउन खोजेकामा विद्यालयलाई धेरै धन्यवाद दिन चाहन्छु ।”

आफू सानै उमेरमा सिर्जनशील हुन खोजेको बताउँदै वडामार्फत् विद्यालयले बाजाको सेट उपलब्ध गराएपछि व्यावसायिकतर्फ अगाडी बढेको समूहका संयोजक सुकबहादुर विकले बताए । उनले भने, “घरमा पनि एक न एक काममा व्यस्त रहन्थे । हाल शुक्लागण्डकी नगरपालिका वडा नम्बर ९ ले बाजाको सेट उपलब्ध गराएपछि मलाई व्यावसायिकता तर्फ अगाडी बढ्ने बाटो खुलेको छ ।” विद्यालयले अतिरिक्त क्रियाकलाप सञ्चालन गर्दा बाहेक अन्य सवालमा समेत नियमित बाजाको प्रयोग बढेको विकको भनाइ छ ।

विद्यालयको सेवा क्षेत्रमा दलित बस्ती बढी भएको र यो क्षेत्रको सम्भावना पनि बाजासँग सम्बन्धित लोक संस्कृतिको क्षेत्र फराकिलो भएको हुँदा बाजाको कार्यक्रमलाई प्राथमिकता दिइएको शुक्लागण्डकी नगरपालिका–९ का वडाध्यक्ष धनबहादुर थापाले बताए ।

उनले भने, “विद्यालयको मागलाई पहिलो प्राथमिकतामा राख्दै विद्यार्थी भाइवहिनीहरुको क्षमतालाई प्रष्फुटन गर्न सहज हुने कार्यक्रमलाई वडा कार्यालयले महत्व दिएको छ । विद्याथी भनेका भविष्यका कर्णधार हुन् । हामीले बनाउने योजना दीर्घकालिन हुनुपर्छ ।”

विद्यार्थी पहिचानको क्षेत्रलाई फराकिलो बनाउँदै विद्यार्थीको आफ्नो क्षमता उजागर गराउन विद्यालय प्रतिबद्ध रहेको विद्यालय व्यवस्थापन समितिका अध्यक्ष विनोद राउतले बताए । उनले विद्यार्थीको क्षमता पहिचान गर्दै व्यावहारिक शिक्षातर्फ विद्यालय अगाडी बढेको उल्लेख गर्नुभयो ।

वडाको एक मात्र माध्यमिक विद्यालय भएको र विद्यालयको भौतिक, शैक्षिक एवं वातावरणीय पक्षको विकासका लागि स्थानीय सरकार तल्लीन रहेको वडा सदस्य एवं विद्यालय व्यवस्थापन समितिका सदस्य कमल थापाले बताए । उनले भने, “वडाको योजना तर्जुमा गर्ने कार्यक्रममा विद्यालयले संस्कृति जगेर्ना गर्ने र स्थानीय कला संस्कृतिको संरक्षणका लागि नौमति बाजाको योजना बनाएको थाहा पाएपछि योजनामा समावेश गरि कार्यान्वयन गरिएको हो ।”

विद्यालयका अतिरिक्त क्रियाकलाप संयोजक शिक्षक दामोदर रेग्मीले सामाजिक अध्ययन तथा मानव मूल्य शिक्षा अध्यापनका लागि समेत बाजा अपरिहार्य रहेको र विद्यालय भनेको लोक संस्कृतिको जर्गेना गर्ने महत्वपूर्ण क्षेत्र समेत भएको हुँदा लोक बाजाको कार्यक्रम विद्यालयको लागि महत्वपूर्ण रहेको बताए ।

उनले भने, “कक्षा ६ देखि ८ सम्मका नौ जना विद्यार्थी भाईहरुको एक समूह छ जसले लोक बाजालाई सञ्चालन र व्यवस्थापन गर्ने जिम्मा समेत लिएको छ । विद्यालयको मात्र नभई शुक्लागण्डकी नगरपालिकाको विभिन्न कार्यक्रमहरु र तनहुँ जिल्ला स्तरीय १६ औँ राष्ट्रपति रनिङशिल्ड प्रतियोगिताको उद्घाटन सत्रमा समेत विद्यार्थी भाईहरुले कुशलतापूर्वक बाजा बजाई आफ्नो कला कौशल प्रदर्शन गरेका थिए ।”