निष्पक्ष र विश्वसनीय खबरको सँगालो 
Khabar Punja
१८ माघ २०८२, आईतवार
चितवन, ९ साउन । चितवनमा बोलेरो गाडीको ठक्करबाट मोटरसाइकल चालकको मृत्यु भएको छ । पूर्वपश्चिम राजमार्ग अन्तर्गत चितवनको रत्ननगर नगरपालिका–३ शान्ति चोकमा खैरहनीबाट टाँडीतर्फ आउँदै गरेको प्रदेश २–०२–००१ च ०५१० नम्वरको तरकारी बोक्ने बोलेरोले गयराती टाँडीबाट खैरहनीतर्फ जाँदै गरेको बा.प्र.०६–००१ प ३५०९ नम्वरको मोटरसाइकललाई ठक्कर दिएको हो ।
जनकपुरबाट काठमाडौंतर्फ जाँदै गरेको बा प्र.०३–००१ ख ३३६५ नम्वरको रात्री बसलाई ओभरटेक गर्ने क्रममा दुर्घटना भएको जिल्ला प्रहरी कार्यालय चितवनका सूचना अधिकारी डीएसपी रवीन्द्र खनालले जानकारी दिए ।
गाडीको ठक्करबाट मोटरसाइकल चालक चितवनको कालिका नगरपालिका २ बस्ने ३५ वर्षिय मुकुन्द कँडेल गम्भिर घाइते भएका थिए । उनको भरतपुर अस्पतालमा उपचारका क्रममा राती १ः१९ बजे मृत्यु भएको खनालले जानकारी दिए ।
बोलेरो चालक कास्की लेखनाथ नगरपालिका २७ वस्ने ३० वर्षिय हुमेस लामगाले र सोही बोलेरो धनी कास्की माछापुच्छ्रे गाउँपालिका ३ बस्ने ३४ वर्षिय ध्रुबराज पोखरेल सामान्य घाइते भएका छन् । प्रहरीले चालकसहित बोलेरो र धनीलाई नियन्त्रणमा लिएको जनाएको छ । बसमा सामन्य क्षति भएको छ भने यात्रुहरुलाई गन्तव्यतर्फ पठाइएको छ ।
