निष्पक्ष र विश्वसनीय खबरको सँगालो 
Khabar Punja
३ जेष्ठ २०८१, बिहीबार
तनहुँ । तनहुँको आँबुखैरेनी गाउँपालिका–१ समस्तीपुरमा शनिबार राति ९ बजे चितुवाको आक्रमणबाट एक बालिका घाइते भएकी छन् । घाइते हुनेमा १० वर्षीया अमिषा थापा रहेको डिभिजन वन कार्यालय तनहुँले जनाएको छ ।
घरको आँगनमा बसिरहेको बेला चितुवाको आक्रमणबाट बालिका घाइते भएको डिभिजन वन कार्यालयका प्रमुख केदार बरालले जानकारी दिनुभयो । चितुवाको आक्रमणबाट घाइते बालिकालाई राति नै उपचारका लागि भरतपुर पठाइएको छ । चितुवाको आक्रमणबाट बालिकाको घाँटीमा चोट लागेको छ ।
हजुरबुबा धनबहादुर पन्तको घरमा बसिरहेकी ती बालिका सोही ठाउँको चन्द्रोदय माध्यमिक विद्यालयमा कक्षा तीनमा अध्ययनरत छिन् । “रातिको समयमा घरको आँगनमा बसेका बेला चितुवाले आक्रमण गरी बालिकालाई घाइते बनाएको छ, रातको समय भएकाले चितुवाले आक्रमण गर्न सजिलो हुने हुनाले विशेष सतर्कता अपनाउनुपर्छ,” बरालले भन्नुभयो ।
