निष्पक्ष र विश्वसनीय खबरको सँगालो 
Khabar Punja
२३ पुष २०८१, बुधबार
तनहुँ : केही समय अगाडी आएको पहिराले घर पूर्ण क्षति भएकालाई तनहुँको बन्दीपुर गाउँपालिकाले राहत रकम वितरण गरेको छ । तनहुँको बन्दीपुर गाउँपालिका–५ धरमपानीका पाँच घरपरिवारलाई गाउँपालिकाले प्रति घर रु ३० हजारका दरले राहत रकम वितरण गरेको हो ।
बन्दीपुर गाउँपालिकाका अध्यक्ष पूर्णसिं थापाले स्थानीय मोहनकुमार श्रेष्ठ, नवराज गुरुङ, कर्णसिं राना, पूर्णबहादुर थापा, डम्बरसिं गुरुङलाई जनही रु ३० हजारका दरले राहत रकम बिहीबार वितरण गर्नुभयो । साथै उनीहरुलाई लत्ताकपडा, खाना पकाउने भाडा लगायतका सामग्री पनि हस्तान्तरण गरिएको छ ।
गत असार २९ र त्यसपछि आएको पहिराले घर भत्किएकालाई गाउँपालिकाले राहत दिने निर्णय गरेको थियो । थापाका अनुसार पूर्ण रुपमा घर क्षति भएकालाई प्रति घर रु ३० हजार र आंशिक घर क्षति भएकालाई प्रति घर रु १० हजारका दरले राहत दिइनेछ । साथै बाढीले खेत बगर भएका किसानलाई प्रति रोपनी रु दुई हजारका दरले राहत दिने तयारी गरिएको उहाँले बताउनुभयो ।
