निष्पक्ष र विश्वसनीय खबरको सँगालो 
Khabar Punja
३० बैशाख २०८१, आईतवार
तनहुँ : तनहुँको ऑबुखैरेनी गाउँपालिकाको राजमार्ग क्षेत्रमा ‘नो हर्न : नो ओभरटेक’ नियम लागु गरिएको छ । कात्तिक १ गतेदेखि ट्राफिक प्रहरी पोष्टदेखि गाउँपालिका कार्यालय गेटसम्म उक्त नियम लागु गरिएको हो ।
दुर्घटना न्युनीकरणका लागि यो अभियान लागु गरिएको ट्राफिक प्रहरी सहायक निरीक्षक राजु श्रेष्ठले जानकारी दिनुभयो । तीव्र गतिका कारण सवारी चलाउँदा र जथाभावी ओभरटेक गर्दा दुर्घटना हुने भएकाले यो अभियान मार्फत दुर्घटना न्युनीकरणमा सहयोग पुग्ने विश्वास गरिएको छ ।
तनहुँ उद्योग वाणिज्य सङ्घ ऑबुखैरेनी इकाईले उक्त ठाउँमा ‘नो हर्न : नो ओभरटेक’ को सङ्केत सामग्री राखेको छ । चालकहरुलाई यस बारेमा जानकारी दिन सचेतनामूलक साम्रगी समेत वितरण गरिएको छ ।
ऑबुखैरेनी गाउँपालिकाले पनि बजार क्षेत्रको ट्राफिक व्यवस्थापनको लागि केही दिन अगाडी सङ्केत सामग्री हस्तान्तरण गरेको थियो ।
यसअघि दमौलीको बुल्दीपुलदेखि मादी पुलसम्मको क्षेत्रलाई पनि ‘नो हर्न : नो ओभरटेक’घोषणा गरिएको थियो ।
तस्वीर : रामबहादुर धामी
