निष्पक्ष र विश्वसनीय खबरको सँगालो 
Khabar Punja
२९ बैशाख २०८३, बुधबार
तनहुँ : व्यास नगरपालिकाका प्रमुख बैकुण्ठ न्यौपानेले तनहुँसुरबाट दमौली आएर बसेकाहरुलाई गाउँ फर्किन आग्रह गर्नुभएको छ । उर्जा तथा वातावरण नेपालको आयोजना, व्यास नगरपालिकाको संयोजन र पुरातत्व विभागको सहयोगमा शुक्रबार आयोजित पुरातात्विक सम्पदाको महत्व सम्बन्धी अभिमुखीकरण कार्यक्रममा नगरप्रमुख न्यौपानेले तनहुँसुरको विकासका लागि अब दमौली झरेकाहरु गाउँ फर्किने बेला आएको बताउनुभयो ।
तनहुँसुरको ऐतिहासिक पक्षलाई ध्यानमा राखेर विकास अभियान सञ्चालन अगाडी बढेकाले त्यहाँबाट बसाइ सरेर दमौली झरेकाहरु गाउँ फर्किएर विकास अभियानमा सहभागी हुन नगरप्रमुख न्यौपानेले आग्रह गर्नुभएको हो । “तनहुँसुरको विकासका लागि एकदमै लगनशील भएर लागेका छौ, तनहुँसुर पुग्ने बाटो कालोपत्रेका लागि काम शुरु भएको छ,” उहाँले भन्नुभयो ।
संविधानसभा सदस्य रामचन्द्र पोख्रेलले खण्डहर बनेको तनहुँसुर बिस्तारै पहिलाकै अवस्थामा फर्किन लागेकोले यहाँको विकासका लागि स्थानीयवासी नै अग्रसर हुनुपर्नेमा जोड दिनुभयो । व्यास नगरपालिकाका प्रमुख प्रशासकीय अधिकृत डिल्लीराम सिग्देलले पुरातात्विक सम्पदाको सम्बद्र्धन र संरक्षणका लागि नगरपालिकाको सदैव सहयोग रहने बताउनुभयो ।
तनहुँसुर दमौली सम्पर्क समाजका अध्यक्ष वृषराज श्रेष्ठले तनहुँसुरको विकासका लागि दमौली झरेका वासिन्दा जुट्न लागेको बताउँदै भग्नावशेष भएका घरहरु पुर्ननिर्माणको अभियान शुरु गरिने बताउनुभयो ।
उक्त कार्यक्रममा सम्पदा नेपालका अध्यक्ष हरिसिं गुरुङले कृषि र वातावरणसँग जोडेर तनहुँसुरको पर्यटन प्रबद्र्धन गर्न लागिएको जानकारी दिनुभयो । सो अवसरमा पुरातत्व विभागका अधिकृत मन्जुसिंह भण्डारी थापाले तनहुँसुरको ऐतिहासिक महत्व र पुरातत्व विभागले तनहुँसुरमा गरेका कामहरुको बारेमा जानकारी गराउनुभयो ।
