निष्पक्ष र विश्वसनीय खबरको सँगालो 
Khabar Punja
१६ मंसिर २०८१, सोमबार
एजेन्सी : स्पेन र इटाली लगातार चौथो पटक युरोपियन च्याम्पियनसिपमा भिड्ने निश्चित भएको छ । जारी युरो २०२० को नकआउटदेखि एउटै पोलमा रहेका दुई टोलीले सेमिफाइनलमा भेट निश्चित गरेका हुन् ।
शुक्रबार राति भएको पहिलो क्वार्टरफाइनलमा स्वीट्जरल्यान्डमाथि पेनाल्टी सुट आउटमा ३-१ गोलको नतिजामा पराजित गर्दै स्पेनले सेमिफाइनलमा स्थान सुरक्षित गरेको थियो । सोही रात भएको अर्को क्वार्टरफाइनलमा बेल्जियममाथि २-१ गोलको जित निकाल्दै इटालीले पनि फाइनल प्रवेशका लागि स्पेनसँगको भेट निश्चित गरेको हो ।
यी दुई टोली फाइनल प्रवेशका लागि मंगलबार राति इङ्ल्यान्डको वेम्ब्ली स्टेडियममा भिड्ने छन् ।
शुक्रबारका खेलसँगै युरो २०२० को पहिलो सेमिफाइनल तय भएको छ । शुक्रबार राति म्युनिखमा इटालीले विश्व नम्बर एक बरियताको बेल्जियम र स्पेनले स्वीट्जरल्यान्डलाई हराएसँगै मंगलबार रातिको भिडन्त निश्चित भएको हो ।
पछिल्लो समय युरोपको सबैभन्दा उत्कृष्ट फर्ममा भएको इटालीले कीर्तिमानी ३२ खेलमा अपराजित यात्रा तय गरिसकेको छ । त्यस्तै, पछिल्ला १३ खेलमा इटालीले सत प्रतिशत नतिजा निकालेको छ । अर्कातिर पछिल्ला १२ खेलमा अपराजित स्पेनले समूह चरणको दुई खेल बराबरी खेलेको थियो ।
अवस्था यस्तै रह्यो भने यी दुई टोलीको खेल प्रतियोगिताका सर्वाधिक गोलकर्ताबीचको भिडन्त हुनेछ । पहिलो खेलमा स्वीडेनसँग गोलरहित बराबरीमा रोकिएको स्पेनले त्यसपछिका खेलमा १२ गोल गरिसकेको छ भने इटालीले ११ गोल गरेको छ ।
दुवै टोलीका कुनै पनि खेलाडीले दुई भन्दा धेरै गोलगरेका छैनन् । इटालीका सिरो इम्मोबिले, माटेओ पेस्सिना, म्यानुएल लोकाटेली र लोरेन्जो इन्सिग्नेले दुई/दुई गोल गरेका छन् । यस्तै, स्पेनिस पाब्लो साराबिया, फेरान टोरेस र अल्भारो मोराटाले समान दुई गोल गरेका छन् ।
यी दुईबीचको अन्तिम भेट विश्वकप २०१८ को छनोटमा भएको थियो । स्पेनसँग एक खेलमा पराजय र अर्कोमा बराबरी नतिजा निकालेको इटाली विश्वकपमा छनोट हुन असफल भएको थियो ।
दुवै टोली अन्तिम पटक ठूला प्रतियोगिताको फाइनल पुगेको भनेको युरो २०१२ मा हो । त्यो फाइनलमा इटालीमाथि ४-० को फराकिलो जित निकाल्दै स्पेन लगातार दोस्रो पटक युरोपियन च्याम्पियन बनेको थियो ।
त्यस बेला टोलीमा रहेका तीन खेलाडी युरो २०२० को पनि स्क्वाडमा छन् । स्पेनका कप्तान सर्जियो बुस्केट तथा इटालीका डिफेन्डर्स जर्जियो केलिनी र लियोनार्डो बोनुसी अहिले पनि टोलीमा छन् ।
इटालीले लगातार तेस्रो पटक युरो जित्ने अभियानमा रहेको स्पेनलाई युरो २०१६ को अन्तिम १६ मा २-० गोलको नतिजामा पराजित गर्दै यात्रामा पूर्णविराम लगाइदिएको थियो । स्पेनले २००८ युरोको क्वार्टरफाइनलमा पेनाल्टीमा पुगेर इटालीलाई पराजित गरेको थियो । सोही प्रतियोगितामा स्पेनले ४४ वर्ष लामो उपाधि खडेरी टारेको थियो । र, त्यसपछिको ६ वर्ष स्पेनले विश्व फुटबलमा राज गरेको थियो ।
स्पेनका मुख्य प्रशिक्षक लुइस इनरिकेको १९९४ विश्वकपमा इटालीविरुद्धको खेलमा नाक भाँचिएको थियो । क्वार्टरफाइनलमा भएको त्यो भिडन्तमा इटालियन डिफेन्डर माउरो टासोट्टीले इनरिकेको नाक भाँचिदिएका थिए ।
त्यो विश्वकपमा इटाली फाइनलसम्म पुगेर ब्राजिलसँग पेनाल्टीमा हारेको थियो ।
इटालीका प्रशिक्षक रोबर्टो मान्सिनी पनि १९९४ विश्वकपको टोलीमा थिएनन् । खेल्ने समय नपाएका टोलीमा चासो नदिएका मान्सिनी २०१८ मा मुख्य प्रशिक्षक बनेर इटालियन राष्ट्रिय फुटबल टोलीमा फर्किएका थिए ।
