निष्पक्ष र विश्वसनीय खबरको सँगालो 
Khabar Punja
७ मंसिर २०८१, शनिबार
भानु । तनहुँको भानु नगरपालिका–११ मा खोलाले बगाएर साेमबार एक वृद्ध बेपत्ता भएका छन् । खोला तर्ने क्रममा बेपत्ता हुनेमा सोही ठाउँ बस्ने ६० वर्षीय चन्द्रबहादुर गुरुङ रहेको इलाका प्रहरी कार्यालय भानुले जनाएको छ ।
आइतबार रातिदेखि परेको वर्षाका कारण ढाडखोलामा आएको बाढीले बगाउँदा गुरुङ बेपत्ता भएको प्रहरी निरीक्षक प्रकाश भुषालले जानकारी दिए। भुषालका अनुसार प्रहरीको टोली घटनास्थलमा पुगेर खोजी कार्य सुरु गरेको छ ।
वर्षाका कारण भानुका विभिन्न ठाउँमा क्षति पुगेको छ । अविरल वर्षाका कारण भानु नगरपालिका–९ बाइसजाँगरदेखि लमजुङको पाँचभाई चौतारा जाने मोटरमार्ग भत्किएको छ ।
यसैगरी वर्षाका कारण भानु नगरपालिका–७, ८ र ९ का विभिन्न ठाउँमा बालीमा क्षति पुगेको छ । स्थानीयवासी सीताराम बजगाईँका अनुसार बीउ राखेको व्याड, खोलाखेत, कुलाहरुको बाँध वर्षाले क्षति पुगेको छ ।
