निष्पक्ष र विश्वसनीय खबरको सँगालो 
Khabar Punja
४ आश्विन २०८१, शनिबार
काठमाडौं । आईसीसी एकदिवसीय विश्वकप–२०२३ को आफ्नो पहिलो खेलमा अस्ट्रेलियाले घरेलु टिम भारतविरुद्ध २०० रनको लक्ष्य प्रस्तुत गरेको छ ।भारतको चेन्नाईस्थित एमए चिदम्बरम रंगशालामा टस जितेर ब्याटिङमा आएको अस्ट्रेलियाले ४९.३ ओभरमा सबै विकेट गुमाएर १९९ रनको योगफल खडा गर्यो ।
अस्ट्रेलियाका कुनै पनि ब्याटर भारतीय बलरसामु खुलेर खेल्न सकेनन् । अस्ट्रेलियाबाट स्टिभ स्मिथले ४६ र डेविड वार्नरले ४१ रन बनाए । यी दुईले दोस्रो विकेटका लागि ६९ रनको साझेदारी गर्दै अस्ट्रेलियाको इनिङ उकास्ने प्रयास गरेका थिए । यसबाहेक, अन्य कुनै पनि समयमा अस्ट्रेलियाले साझेदारी बनाउन सकेन ।
अस्ट्रेलियाका मार्नुस लाबुसचेन्जले २७ रन जोड्दा ग्लेन म्याक्सवेल र कप्तान प्याट कुमिन्सले समान १५ रन थपे । नवौँ नम्बरमा ब्याटिङका लागि आएका मिचेल स्टार्कले २८ रन बनाए ।भारतका रविन्द्र जडेजाले तीन विकेट लिए । १० ओभर बलिङ गरेका जडेजाले एक मेडन राख्दै २८ रन खर्चिए । कुलदीप यादव र जसप्रित बुमराहले समान दुई विकेट लिए । रविचन्द्रन आश्विन, हार्दिक पन्ड्या र मोहम्मद सिराजले एक–एक विकेट हात पारे ।
