निष्पक्ष र विश्वसनीय खबरको सँगालो 
Khabar Punja
२४ बैशाख २०८१, सोमबार
दमाैली । बन्दीपुर गाउँपालिकाले पालिकाभित्र रहेका बजारमा सञ्चालित खाद्यान्न, किराना, होटल लगायत अनुगमन गरेको छ। खाद्यान्न तथा दैनिक उपभोग्य वस्तुमा मूल्यबृद्धि, मिति नाघेका वस्तुको बिक्री वितरण भए नभएको विषयमा अनुगमन गरिएको हो ।
गाउँपालिकाका उपाध्यक्ष एवं अनुगमन समितिका संयोजक पञ्चमाया गुरुङको नेतृत्वमा गाउँपालिका वडा नम्बर १ स्थित डुम्रेबजारमा अनुगमन गरिएकाे हाे ।
व्यवसायीले अखाद्य बस्तुहरु बिक्रि गरेको, आवश्यक प्रक्रिया नै पूरा नगरी व्यवसाय सञ्चालन गरेको, मूल्यसूची नराखेको, नविकरण नगरेको पाइएकाले तत्काल सच्याउन आवश्यक निर्देशन दिइएको गाउँपालिका गुरुङले बताइन् ।
अनुगमनका क्रममा मिठाइ, मसला, जुस लगायतका केही सामग्री अखाद्य, म्याद गुज्रिएका भेटिएकाले अनुगमन टोलीले जफत गरेको छ ।
चाडपर्वको समयमा मात्रै औपचारिकता निभाउनको लागि बजार अनुगमन गरिन्छ भन्ने भ्रम चिर्न अनुगमन गरिएको उनकाे भनाइ छ । अनुगमन टोलीले खाद्य सामग्रीको म्याद, गुणस्तर, नापतौलको अवस्था, व्यवसायीले सम्बन्धित निकायमा दर्ता आबद्धता कागजातहरू सबैले देख्ने गरी राख्ने गरे–नगरेको, व्यवसायको नाम, मूल्यसूची हेर्नुका साथै प्यान र पसल दर्ता गरिएको फर्म उपभोक्ताले देख्ने गरी राख्न व्यवसायीलाई निर्देशन दिएको छ ।
सर्वसाधारणको गुनासो आएपछि वडा नम्बर १ मा रहेका विभिन्न २७ वटा मिठाइ पसल किराना पसल लगायतमा अनुगमनका गरिएको थियो । यस अघि पनि डुम्रेबजारका केही पसलहरुलाइ जरिवाना गरिएको थियो ।
