निष्पक्ष र विश्वसनीय खबरको सँगालो 
Khabar Punja
१३ मंसिर २०८१, शुक्रबार
दमाैली । जिल्ला प्रशासन कार्यालय तनहुँमा सेवा लिन आएका ज्येष्ठ नागरिकलाई युवा अभियान्ता सुदीप गफ्फारले खाना खुवाउने व्यवस्था मिलाएका छन् । राष्ट्रिय परिचयपत्रका लागि बिहान ६ बजेदेखि आएका सर्वसाधारणलाई गफ्फारले शुक्रबारदेखि खाना खुवाउन थालेका हुन् ।
एकाबिहानैदेखि कार्यालयमा आएर घण्टौसम्म पनि सेवा नपाउने अवस्था रहेको र भोकभोकै बस्नुपर्ने बाध्यता रहेकाले खाना खुवाउने व्यवस्था मिलाएको उनले बताए । उनले भने, “बुबाआमाहरु टाढा टाढाबाट बिहान ४÷५ बजेदेखि प्रशासन कार्यालय आइरहनुभएको छ । उहाँहरुलाई खाना खाने समय पनि नमिलेको भएर निःशुल्क खाना खुवाउने व्यवस्था मिलाइएको छ ।”
सहज रुपमा राष्ट्रिय परिचयपत्र प्राप्त नभइन्जेल र ज्येष्ठ नागरिकलाई खानाको समय नमिल्दासम्म खाना खुवाउने उनको भनाइ छ । पहिलो दिन ९० जनाले खाना खाएको उनले बताए ।
प्रशासनमा सेवा लिन आएकी व्यास नगरपालिका–७ हरिमाया बानियाँले निःशुल्क भोजनको व्यवस्था गरेर पुण्यको काम गरेको बताइन् । उनले भनिन्, “बिहान ६ बजेदेखि प्रशासनमा आएर लाइन बसेको र खाना खानका लागि कता जाने भन्ने थियो, निःशुल्क खाना खुवाउने व्यवस्था छ भन्ने सुनेर हामी तीन जना आएर खायौ ।”
Video का लागि क्लिक गर्नुहाेस्
