निष्पक्ष र विश्वसनीय खबरको सँगालो 
Khabar Punja
१७ श्रावण २०८१, शुक्रबार
दमाैली । तनहुँको बन्दीपुर गाउँपालिका–५ याम्पामा र व्यास नगरपालिका–१२ घाँसीकुवामा आज बिहान पहिरा खस्दा राजमार्ग अवरुद्ध भएको छ ।
बिहीबार राति परेको भीषण वर्षाका कारण आज बिहान खसेको पहिराका कारण पृथ्वीराजमार्ग अवरुद्ध भएको हो । याम्यामा बिहान ४ बजे गएको पहिरा हटाइएपनि पुनः रुखहरु ढलेर राजमार्ग अवरुद्ध भएको छ । निर्माणाधीन मुग्लिन पोखरा सडक योजना (पूर्वी खण्ड) को निर्माण कम्पनीको सहयोगमा पहिरा पन्छाउने काम भइरहेको जिल्ला प्रहरी कार्यालय तनहुँले जनाएको छ ।
यस्तै बन्दीपुर गाउँपालिका–५ नयाँपुल नजिक समेत पहिराले सडक अवरुद्ध भएको छ । पहिराका कारण व्यास नगरपालिका–१२ कमलबारी नजिक समेत बाटो अवरुद्ध भएको प्रहरीले जनाएको छ ।
यस्तै व्यास नगरपालिका–१२ घाँसीकुवामा पहिरा खस्दा यो खण्ड समेत अवरुद्ध भएको छ । पहिराका कारण सडकछेउ रहेका डाेजर आधी पुरिएको छ । डोजर लगायतका मेसिन पुरिएर बाहिर निकाल्न नपाउँदा अन्यत्र पहिरा पन्छाउन जान सकिएको छैन ।
