निष्पक्ष र विश्वसनीय खबरको सँगालो 
Khabar Punja
२२ चैत्र २०८१, आईतवार
दमौली । ऑबुखैरेनी गाउँपालिकालाई बालमैत्री गाउँपालिका घोषणाको तयारी गरिएको छ। गाउँपालिकालाई विसं २०८२ चैत मसान्तसम्म बालमैत्री गाउँपालिका बनाउने तयारी गरिएको हो ।
गाउँपालिका अध्यक्ष शुक्र चुमान सहित जनप्रतिनिधि एवं सरोकारवालाले पालिकालाई बालमैत्री स्थानीय तह बनाउन सामूहिक प्रतिबद्धता व्यक्त गरेका छन् ।
गाउँपालिकाले आगामी दिनमा निर्माण गर्ने हरेक विकास निर्माणलाई बालमैत्री तरिकाले निर्माण गर्ने चुमानले बताए ।
बालमैत्री स्थानीय शासन कार्यान्वयन निर्देशिका २०७८ अनुसार बालमैत्री स्थानीय शासनका ५१ वटा न्यूनतम सूचकहरु तोकिएका छन् । जसमा बाल बचाउतर्फ १४, बाल संरक्षणतर्फ १०, बाल विकासतर्फ ६, बाल सहभागितातर्फ ६ र संस्थागत विकासतर्फ १५ वटा सूचक तोकिएका छन् ।
दक्ष स्वास्थ्यकर्मीबाट सुत्केरी गराइएको हुनुपर्ने, ५ वर्षमुनिका सबै बालबालिकाको जन्मदर्ता भएको हुनुपर्ने, स्थानीय तह बालविवाह मुक्त भएको हुनुपर्ने, सडक बालबालिकाको संख्या शून्य भएको हुनुपर्ने, ५ देखि १४ वर्ष उमेरसमूहका शतप्रतिशत बालबालिकाले आधारभूत शिक्षा पुरा गरेको हुनुपर्ने लगायतका बालबालिकाको अधिकारसँग सम्बन्धित बिषयहरु सूचकको रुपमा छन् ।
बालमैत्री पालिका बनाउने तयारी स्वरुप बुधबार बालमैत्री स्थानीय शासन सम्बन्धि अभिमुखीकरण गरिएको छ ।
कार्यक्रममा राष्ट्रिय बाल अधिकार परिषद, गण्डकी प्रदेश समन्वय अधिकृत बद्री प्रसाद वाग्लेले कार्यक्रमको विषय प्रति सहजीकरण गरेका थिए ।
