Khabar Punja

बन्दीपुर, नेपालको एक अनुपम पहाडी पर्यटकीय गन्तव्य हो, जहाँ प्राकृतिक सौन्दर्य, ऐतिहासिक धरोहर, र रोमाञ्चक साहसिक गतिविधिहरूको अनौठो संयोजन पाइन्छ। यहाँको ऐतिहासिक बजार, पुराना शैलिका घरहरू, पत्थरले छापिएका गल्लीहरू, र सांस्कृतिक धरोहरहरूले बन्दीपुरलाई विशेष बनाएको छ। यी सम्पदाले नेपालका प्राचीन परम्परा र वास्तुकलाको अद्भूत झल्को दिन्छन्। गुरुङचे हिलबाट सूर्योदयको दृश्य हेर्दा हिमालयको मनमोहक दृश्य र हरियालीले भरिएको उपत्यका अवलोकन गर्न सकिन्छ, जसले यहाँको भ्रमणलाई अझ अविस्मरणीय बनाउँछ।
बन्दीपुर भ्रमण वर्ष २०२५ लाई सफल बनाउन बन्दीपुर गाउँपालिका, बन्दीपुर पर्यटन विकास समिति, होटल संघ, बन्दीपुर सामाजिक विकास समिति लगायतका संघसंस्थाहरूले विभिन्न योजनाबद्ध कार्यक्रमहरू सञ्चालन गरिरहेका छन्। बन्दीपुर गाउँपालिकाले पर्यटन पूर्वाधार सुधारका साथै सरसफाइ, सडक मर्मत, तथा सूचना केन्द्रहरूको स्थापना गरी पर्यटकलाई आवश्यक सुविधा उपलब्ध गराउने काम गरिरहेको छ। स्थानीय सम्पदा संरक्षण, संस्कृति प्रवद्र्धन तथा पर्यटकीय गन्तव्यहरूको प्रवर्धनका लागि गाउँपालिकाले विभिन्न सचेतनामूलक कार्यक्रमहरू सञ्चालन गरिरहेको छ।

बन्दीपुर पर्यटन विकास समितिले प्रचार–प्रसारलाई प्रभावकारी बनाउन विभिन्न राष्ट्रिय तथा अन्तर्राष्ट्रिय मञ्चहरूमा बन्दीपुरको पर्यटन सम्भावनालाई उजागर गर्ने कार्य गरिरहेको छ। डिजिटल मिडिया, वृत्तचित्र, ब्रोसर, र सामाजिक सञ्जालमार्फत बन्दीपुरको प्रचारलाई तीव्र बनाइँदै छ। साथै, स्वदेशी तथा विदेशी पर्यटक आकर्षित गर्नका लागि विशेष प्याकेजहरू निर्माण गरिएका छन्, जसअन्तर्गत समूहगत भ्रमण, ऐतिहासिक तथा सांस्कृतिक पदयात्रा र साहसिक खेलकुद कार्यक्रमहरू समावेश छन्।

होटल संघ बन्दीपुरले पर्यटकलाई स्तरीय सेवा प्रदान गर्नका लागि होटेल तथा लजहरूको स्तरोन्नति, आधुनिक प्रविधिको प्रयोग तथा स्थानीय परिकारको प्रवद्र्धनमा विशेष ध्यान दिइरहेको छ। स्थानीय होटल व्यवसायीहरूले पर्यटकहरूको सुविधालाई ध्यानमा राख्दै विविध अफर तथा छुट प्रदान गर्ने योजनाहरू अगाडि सारेका छन्।

बन्दीपुर सामाजिक विकास समितिले वातावरण संरक्षण, सम्पदा संरक्षण, तथा स्थानीय जनताको प्रत्यक्ष संलग्नतासहित पर्यटन प्रवद्र्धनका कार्यक्रमहरू सञ्चालन गरिरहेको छ। स्थानीय समुदायलाई पर्यटनसँग जोडेर उनीहरूको आयआर्जन वृद्धि गर्ने उद्देश्यले व्यावसायिक तालिम, हस्तकला प्रवद्र्धन, र स्थानीय उत्पादन बजार व्यवस्थापनमा समेत जोड दिइएको छ।
बन्दीपुरले साहसिक गतिविधिहरूमा रुचि राख्ने पर्यटकहरूलाई भरपूर अवसर प्रदान गर्दछ। यहाँको सिद्ध गुफा र नयाँरानी गुफा जस्ता स्थानहरूले पर्यटकलाई प्राकृतिक संरचना र रहस्यमय वातावरणको अनुभव दिलाउँछन्। पदयात्रा तथा माउन्टेन बाइकिङ जस्ता गतिविधिहरू पहाडी बाटोहरूको रोमाञ्चक यात्रा गराउँदै, प्रकृतिसँग नजिक रहने अवसर प्रदान गर्छन्। यी रोमाञ्चक गतिविधिहरूले बन्दीपुर भ्रमणलाई थप रोचक बनाउँछन्।

साहसिक खेल प्रेमीहरूका लागि यहाँ प्याराग्लाइडिङको समेत सुविधा उपलब्ध छ। प्याराग्लाइडिङ गर्दा आकाशमा उड्दै हरियालीले ढाकिएको उपत्यका र हिमशृंखलाको सुन्दर दृश्य अवलोकन गर्न सकिन्छ, जसले पर्यटकहरूलाई अविस्मरणीय अनुभव प्रदान गर्दछ। धार्मिक पर्यटकहरूको लागि बन्दीपुरमा खड्गदेवी मन्दिर र थानीमाई मन्दिर जस्ता धार्मिक स्थलहरू पनि रहेका छन्। यी स्थलहरूमा पुग्दा धार्मिक आस्था, शान्ति र सांस्कृतिक विविधताको अनुभव गर्न सकिन्छ। धार्मिक तथा सांस्कृतिक महत्त्वका कारण पनि यी स्थानहरू पर्यटकहरूका लागि प्रमुख गन्तव्य बनेका छन्।

अन्ततः, बन्दीपुर केवलकार सञ्चालनमा आएपछि यहाँको यात्रा अझ सहज, आरामदायी र रमाइलो बनेको छ। केवलकारको माध्यमबाट छोटो समयमै बन्दीपुर पुग्न सकिन्छ, जसले यात्रालाई अझ प्रभावकारी बनाएको छ। यसले बन्दीपुरलाई अझ आकर्षक पर्यटकीय गन्तव्य बनाउन महत्वपूर्ण भूमिका खेलेको छ।

बन्दीपुर भ्रमण वर्ष २०२५ लाई सफल बनाउनका लागि तपाईंलाई यहाँको प्राकृतिक सौन्दर्य, ऐतिहासिक सम्पदा र साहसिक गतिविधिहरूको अनुभव गर्न हार्दिक निमन्त्रणा गर्दछौं। यस अवसरमा, बन्दीपुरलाई एक ऐतिहासिक र अविस्मरणीय गन्तव्यका रूपमा स्थापित गर्न हामी सबै मिलेर अघि बढौं। आउनुहोस्, बन्दीपुरको प्रकृति, संस्कृति, र साहसिक यात्राको आनन्द उठाऔं र यसलाई आफ्नो यात्रा सूचीमा समावेश गरौं!