निष्पक्ष र विश्वसनीय खबरको सँगालो 
Khabar Punja
९ पुष २०८२, बिहीबार
दमौली, १६ भदौ । जिल्ला प्रशासन कार्यालय तनहुँले पूर्ण अशक्त अपाङ्गता भए जनालाई आइतबार घरमै पुगेर नागरिकताको प्रमाणपत्र प्रदान गरेको छ । व्यास नगरपालिका–११ निवासी मिनानाथ पन्थ र पवित्रादेवी पन्थकी छोरी २७ वर्षीया सविना पन्थलाई कार्यालयले घरमै पुगेर नागरिकताको प्रमाणपत्र प्रदान गरेको हो ।
प्रमुख जिल्ला अधिकारी रामकृष्ण अधिकारीले ती युवतीलाई घरमै पुगेर नागरिकताको प्रमाणपत्र प्रदान गरेका हुन् । विविध कारणवश हालसम्म नागरिकता प्राप्त नगरेकी उनलाई नागरिकताको प्रमाणपत्र प्रदान गरिएको प्रजिअ अधिकारीले जानकारी दिए ।
प्रमुख जिल्ला अधिकारी अधिकारीले भन्नुभयो, “नागरिकहरुलाई छिटो, छरितो र सहुलियत ढङ्गले सेवा प्रवाह गर्नु हाम्रो कर्तव्य हो, उहाँ अपाङ्गता भएका कारण आवतजावतमा समस्या हुने भएपछि घरमै पुगेर नागरिकता दियौ ।” प्रजिअ अधिकारीले यस्ता कार्यले सरकारप्रतिको भरोसा र सकारात्मक धारणा विकास भएर जाने उल्लेख गरे ।
यसअघि प्रजिअ अधिकारीले गत साउन ६ गते म्याग्दे गाउँपालिका–१ गुणादी निवासी अपाङ्गता भएकी २० वर्षीया नविना खनाललाई पनि घरमै पुगेर नागरिकताको प्रमाणपत्र प्रदान गरेका थिए ।
