निष्पक्ष र विश्वसनीय खबरको सँगालो 
Khabar Punja
५ माघ २०८२, सोमबार
दमौली, माघ। जिल्लाको म्याग्दे गाउँपालिका–६ छविसे स्थित पृथ्वीराजमार्ग सडकखण्डमा बसको ठक्करबाट सोमबार एक पैदलयात्री गम्भीर घाइते भएका छन्।
प्रहरी चौकी थर्पु तनहुँका अनुसार दमौलीबाट पोखरातर्फ जाँदै गरेको बाग्मती प्रदेश ०१–००६ ख ६८१४ नम्बरको बसले सडक पार गर्दै गरेका अन्दाजी २५–३० वर्ष उमेरका एक पुरुषलाई ठक्कर दिएको हो। घाइते व्यक्तिको नाम, थर र वतन खुल्न नसकेको जिल्ला प्रहरी कार्यालय तनहुँका प्रहरी नायब उपरिक्षक श्रवणकुमार विकले जानकारी दिए ।
प्रहरीका अनुसार ती व्यक्ति विगत २–३ दिनदेखि अकला मन्दिर परिसरमा देखिँदै आएका तथा फरक क्षमता भएका व्यक्ति रहेको जनाइएको छ। दुर्घटनामा उनको कम्मरको भागमा गम्भीर चोट लागेको र अवस्था सिरियस रहेको छ। घाइतेलाई थप उपचारका लागि गण्डकी अस्पताल पोखरा पठाइएको छ।
दुर्घटनामा संलग्न बस र बस चालक चितवन जिल्लाको इच्छाकामना गाउँपालिका–६ कालीखोला निवासी ३८ वर्षीय मनबहादुर गुरुङलाई इलाका प्रहरी कार्यालय बेलचौतारा तनहुँले नियन्त्रणमा लिएको छ।
