निष्पक्ष र विश्वसनीय खबरको सँगालो 
Khabar Punja
७ बैशाख २०८३, मंगलवार
दमौली, २ वैशाख । व्यास नगरपालिकाको ३४ औं स्थापना दिवसका अवसरमा आयोजित अन्तरजिल्ला पालिकास्तरीय भलिबल प्रतियोगिताको उपाधि पुरुषतर्फ शुक्लागण्डकी नगरपालिका र महिलातर्फको उपाधि देवघाट गाउँपालिकाले जितेको छ ।
आज सम्पन्न फाइनल खेलमा पुरुषतर्फ भिमाद नगरपालिकालाई पराजित गर्दै शुक्लागण्डकी नगरपालिकाले उपाधि जितेको हो । शुक्लागण्डकीले भिमादलाई ३–१ सेटले पराजित गरेको हो ।
यस्तै महिलातर्फ देवघाट गाउँपालिकाले घिरिङ गाउँपालिकालाई सोझो सेटमा पराजित गरेको हो ।
पुरुषतर्फको विजेता शुक्लागण्डकी नगरपालिकालाई नगद रु एक लाख, ट्रफी र प्रमाणपत्र प्रदान गरिएको छ । उपविजेता बनेको भिमाद नगरपालिकाले नगद रु ७५ हजार, ट्रफी र प्रमाणपत्र प्राप्त गरेको छ ।
महिलातर्फको विजेता देवघाट गाउँपालिकाले नगद रु ७५ हजार, ट्रफी र प्रमाणपत्र प्राप्त गरेको छ भने उपविजेता घिरिङ गाउँपालिकाले नगद रु ५० हजार, ट्रफी र प्रमाणपत्र प्राप्त गरेको छ ।
प्रतियोगितामा पुरुषतर्फ छ र महिलातर्फ सात पालिकाको सहभागिता रहेको थियो । प्रतियोगिता सोमबारदेखि सुरु भएको हो ।
विजेतालाई व्यास नगरपालिकाका प्रमुख वैकुण्ठ न्यौपाने, उपप्रमुख इन्दिरा दरै, वडाध्यक्ष एवं नगर खेलकुद विकास समितिका संयोजक जीवन गुरुङ लगायतले पुरस्कार वितरण गरेका थिए ।
