Khabar Punja

एजेन्सी, ६ वैशाख । अमेरिका र इरानबीच जारी युद्धविरामको समय समाप्त हुन अब केवल तीन दिन बाँकी छँदा मध्यपूर्वमा तनाव पुनः चरम सीमामा पुगेको छ। इरानको शक्तिशाली सैन्य बल ‘इस्लामिक रिभोलुसनरी गार्ड कर्प्स’ ले विश्वकै व्यस्त व्यापारिक जलमार्ग ‘होर्मुज जलडमरू’ पुनः बन्द गर्ने घोषणा गरेपछि अन्तर्राष्ट्रिय बजार र सुरक्षा व्यवस्थामा हलचल मच्चिएको हाे ।

केही दिनअघि मात्रै इरानी विदेशमन्त्री अब्बास अराघचीले जलमार्ग खुला रहने संकेत दिएपछि विश्व बजारमा कच्चा तेलको मूल्य १० प्रतिशतले ओरालो लागेको थियो। अमेरिकी राष्ट्रपति डोनाल्ड ट्रम्पले पनि उक्त कदमको स्वागत गर्दै इरानलाई धन्यवाद दिएका थिए। तर, यो राहत धेरै समय टिक्न सकेन। शनिबार इरानको तर्फबाट जारी नयाँ विज्ञप्तिले परिस्थितिलाई पुनः अन्यौलपूर्ण बनाइदिएको छ।

इस्लामिक रिभोलुसनरी गार्डले जारी गरेको पछिल्लो चेतावनीमा भनिएको छ, “अमेरिकी नाकाबन्दी जारी रहेसम्म होर्मुज जलडमरूमा कुनै पनि जहाजको आवतजावतलाई अनुमति दिइने छैन। यहाँ प्रवेश गर्ने जुनसुकै जहाजलाई शत्रुको सहयोगी मानिनेछ र सिधै आक्रमणको निशाना बनाइनेछ।” सो घोषणाको लगत्तै ओमानको तट नजिकै दुईवटा व्यापारिक ट्याङ्करहरूमाथि इरानी गनबोटहरूले आक्रमण गरेको अपुष्ट समाचारहरू प्राप्त भएका छन्।