निष्पक्ष र विश्वसनीय खबरको सँगालो 
Khabar Punja
२७ असार २०८३, आईतवार
दमौली, २७ असार । व्यास नगरपालिका–५ स्थित साँगे बरबोटे क्षेत्रमा शनिबार स्थानीय युवाले श्रमदानमार्फत सडक मर्मत गरेका छन्।
सडकमा खाल्डाखुल्डी बढ्दै गएपछि आवतजावतमा कठिनाइ हुनुका साथै दुर्घटनाको जोखिम बढेको भन्दै नाइन्टिज क्लबका सदस्यहरू स्वयं अग्रसर भएर सडक मर्मत कार्यमा जुटेका हुन्। क्लबका सदस्यहरूले खाल्डा पुर्ने, सडक सम्याउने तथा सवारीसाधन सञ्चालनलाई सहज बनाउन श्रमदान गरेका थिए।
स्थानीयवासीका अनुसार वर्षायामका कारण सडक थप जीर्ण बन्दै गएको र सम्बन्धित निकायबाट तत्काल मर्मत हुन नसकेपछि युवाहरूले आफ्नै पहलमा सडक सुधारको अभियान थालेका हुन्। यसबाट स्थानीय बासिन्दा तथा दैनिक रूपमा सडक प्रयोग गर्ने यात्रुले केही राहत महसुस गरेका छन्।
क्लबका सदस्यहरूले सडकको दीर्घकालीन स्तरोन्नतिका लागि सम्बन्धित निकायले आवश्यक पहल गर्नुपर्नेमा जोड दिएका छन्। स्थानीयवासीले पनि युवाहरूको सामाजिक उत्तरदायित्व र सक्रियताको प्रशंसा गर्दै यस्ता अभियानले समुदायमा सकारात्मक सन्देश दिएको बताएका छन्।
