निष्पक्ष र विश्वसनीय खबरको सँगालो 
Khabar Punja
२७ पुष २०८१, आईतवार
दमाैली । आगामी वैशाख ३० गते हुने स्थानीय तहको निर्वाचनको पर्यवेक्षणका लागि तनहुँमा राष्ट्रिय निर्वाचन पर्यवेक्षण समिति (नियोक) को शाखा पुर्नगठन गरिएको छ । दमौलीमा आयोजित भेलाले नेपाल पत्रकार महासङ्घ गण्डकी प्रदेश समितिकी उपाध्यक्ष सोनी शर्माको संयोजकत्वमा ११ सदस्यीय जिल्ला स्तरीय पर्यवेक्षण समिति गठन गरेको हो ।
समितिको सह–संयोजकमा गैरसरकारी संस्था महासङ्घ तनहँुका अध्यक्ष प्रकाशचन्द्र भट्टराई र कोषाध्यक्षमा दलित पत्रकार सङ्घका पूर्णबहादुर विके चयन भएका छन् । यस्तै सदस्यहरुमा नेपाल एकीकृत ग्रामीण विकास केन्द्रका ऋषिकान्त दुवाडी, आदिवासी जनजाति पत्रकार महासङ्घ (फोनिज) की केन्द्रीय सदस्य मिला दरै, पत्रकार महासङ्घ तनहँुका सदस्य उपेन्द्र खनाल, जागौं युवा नेपालका सदस्य सविन लामिछाने, एसओएस बालग्रामकी अन्जना पन्थ भण्डारी, मानवअधिकार समूह भानुकी सदस्य तुलसी गन्धर्व, मुस्लिम महिला समुहकी साहिदा खातुन र मादीसेती एफएमकी पत्रकार शर्मिला गुरुङ चयन भएका छन् ।
नियोकले निर्वाचन प्रक्रियाको समग्र पर्यवेक्षण गर्ने र निर्वाचनको दिन मतदान केन्द्रहरुमा पर्यवेक्षक परिचालन गर्ने सह–संयोजक प्रकाशचन्द्र भट्टराईले जानकारी दिए । नियोकले यस अघिका निर्वाचनहरुमा पनि पर्यवेक्षण गर्दै आइरहेको छ ।
समितिले साेमबार प्रमुख जिल्ला अधिकारी र जिल्ला निर्वाचन अधिकारीलाई भेटेर समिति गठनबारे जानकारी दिएको छ ।
