निष्पक्ष र विश्वसनीय खबरको सँगालो 
Khabar Punja
६ आश्विन २०८१, सोमबार
दमाैली । स्वास्थ्य कार्यालय तनहुँले जिल्लामा दादुरा रुबेला खोप अभियान सुरु गरेको छ । कार्यालयले आज एक कार्यक्रमको आयोजना गरी दादुरा रुबेला खोप अभियान सुरु गरेको हो ।
कार्यालयमा आयोजित कार्यक्रममा गण्डकी प्रदेशसभा सदस्य अशोककुमार श्रेष्ठ, जिल्ला समन्वय समितिका प्रमुख शान्तिरमण वाग्ले, प्रमुख जिल्ला अधिकारी जनार्दन गौतम लगायतले स्वास्थ्यकर्मीलाई खोप सामग्री हस्तान्तरण गरी अभियान सुरु गरे ।
कार्यक्रममा गण्डकी प्रदेशसभा सदस्य श्रेष्ठले ग्रामीण स्तरसम्म अभियानको बारेमा प्रचारप्रसार गरी सबै बालबालिकालाई खोपको पहुँचमा ल्याउनुपर्ने बताए ।
जिल्ला समन्वय समितिका प्रमुख वाग्लेले बालबालिकालाई विभिन्न रोगबाट बचाउन खोप लगाउनुपर्ने भएकाले जिल्लाका सबै वडा तहसम्म दादुरा रुबेला खोप अभियानको प्रचारप्रसार गर्नुपर्नेमा जोड दिए ।
स्वास्थ्य कार्यालयका प्रमुख शङ्करबाबु अधिकारीका अनुसार जिल्लामा दुई चरणमा खोप अभियान सञ्चालन हुँदैछ । त्यसक्रममा २० हजार बालबालिकालाई दादुरा रुबेला खोप लगाइने उनले जानकारी दिए ।
पहिलो चरणमा फागुन १५ गतेदेखि १९ गतेसम्म व्यास नगरपालिका, देवघाट गाउँपालिका, बन्दीपुर गाउँपालिका, आँबुखैरेनी गाउँपालिका र म्याग्दे गाउँपालिकामा खोप अभियान सञ्चालन हुनेछ । दोस्रो चरणमा फागुन २२ गतेदेखि २७ गतेसम्म भानु नगरपालिका, शुक्लागण्डकी नगरपालिका, भिमाद नगरपालिका, ऋषिङ गाउँपालिका र घिरिङ गाउँपालिकामा खोप अभियान सञ्चालन गरिनेछ ।
खोप अभियानका लागि जिल्लाका दुई सय ३८ खोपकेन्द्रमा दुई सय ३८ स्वास्थ्यकर्मी, चार सय ६६ स्वयंसेवक र प्रत्येक पालिकामा एक जना चिकित्सक परिचालित गरिएको छ ।
समुदायमा दादुरा रुबेला रोग विरुद्ध उच्च क्षमता शक्ति विकास गर्न र कन्जेनिटल रुबेला सिण्ड्रमको सङ्ख्यामा उल्लेख कमी ल्याई यसबाट हुने अपाङ्गता र मृत्युदरलाई शुन्य अवस्थामा पु¥याउन अभियान सञ्चालन गर्न लागिएको हो ।
खोपको पहँुचबाट बाहिर रहेका बालबालिकालाई खोपको पहुँचमा ल्याउन जिल्लाका प्रत्येक स्वास्थ्य संस्थामा प्रत्येक महीना संस्थागत खोपकेन्द्र, साविकका गाविसहरुको वडामा कम्तिमा तीनदेखि पाँच वटा केन्द्रबाट प्रत्येक महिना बाह्य खोपकेन्द्र, गाउँपालिका र नगरपालिकाको स्वास्थ्य संस्थाका पकडक्षेत्रभित्र रहेका पहुँचबाट टाढा भएका बस्ती, समुदाय र भौगोलिक क्षेत्रमा कम्तिमा वर्षको चार पटक खोप केन्द्र स्थापना गरी खोप सेवा प्रदान गरिएको छ ।
दादुरा र रुबेला दुबै रोगहरु भाइरसबाट हुने र यसले महामारीको रुप लिन सक्ने भएकाले खोप लगाउनुपर्ने स्वास्थ्यकर्मीको भनाई छ । खोप अभियान सञ्चालनका लागि जिल्लामा स्वास्थ्यकर्मीलाई तालिम, जिल्लास्तरमा अभिमुखीकरण, सबै पालिकाहरुमा अभिमुखीकरण सम्पन्न भइसकेको कार्यालयले जनाएको छ ।
