Khabar Punja

तनहुँ : घिरिङ गाउँपालिकाले चालु आर्थिक बर्ष २०७७/७८ का लागी ४२ करोड २० लाख ८५ हजार ८ सय १७ रुपैयाँको बजेट ल्याएको छ । असार १० गते गाउँसभामा प्रस्तुत भएको बजेट भदौको पहिलो साता चालुतर्फ २३ करोड ४२ लाख ८० हजार १ सय ४९ रुपैयाँ र पुँजीगततर्फ १८ करोड ७८ लाख ५ हजार १ सय ६८ रुपैयाँ पारित गरेको हो ।

बजेटले पुर्वाधार बिकासलाई प्राथमिकता दिएको गाउँपालिका अध्यक्ष रनबहादुर रानाले जानकारी दिनुभयो । उहाँका अनुसार पुर्वाधार बिकासमा चार करोड ५१ लाख २० हजार ७ सय ४७ रुपैयाँ विनियोजन भएको छ । सामाजिक बिकासतर्फ दुई करोड ७५ लाख रुपैयाँ, संस्थागत बिकासमा दुई करोड ५६ लाख ७९ हजार ६ सय ६८ रुपैयाँ, आथिर्क बिकासमा एक करोड ३० लाख रुपैयाँ र विपद व्यवस्थापनमा ७० लाख रुपैयाँ विनियोजन भएको छ ।

वडा र गाउँपालिकाबाट कार्यन्वयन हुने गरी लागी वडा नम्बर १ लाई एक करोड ३६ लाख ५० हजार रुपैयाँ, २ मा एक करोड ४३ लाख ५० हजार रुपैयाँ, ३ मा एक करोड ११ लाख ५० हजार रुपैयाँ, ४ मा एक करोड १९ लाख ७४ हजार रुपैयाँ र वडा नम्बर ५ लाई एक करोड २६ लाख ५० हजार गरी ६ करोड ३७ लाख ७४ हजार रुपैयाँ विनियोजन गरिएको छ ।

गाउँपालिकाले आफ्नै एम्बुलेन्स र जेसिबी खरिद गर्ने भएको छ । ‘नागरिकलाई स्वास्थ्यको पहुँचमा ल्याउन एम्बुलेन्स किन्ने, वडा नम्बर २ को भुवरकोट र वडा नम्बर ५ को बल्छीगौँडामा स्वास्थ्य ईकाइ सञ्चालनमा ल्याउने निर्णय गरेका छौँ’, गाउँपालिका अध्यक्ष रानाले भन्नुभयो । यस्तै, वडा नम्बर ५ मा अवस्थित सरस्वती मावीमा कक्षा ११ र १२ सञ्चालन गर्न १५ लाख रुपैयाँ अनुदान प्रदान गर्ने गाउँपालिकाले जानकारी दिएको छ ।