निष्पक्ष र विश्वसनीय खबरको सँगालो 
Khabar Punja
३० कार्तिक २०८१, शनिबार
एजेन्सी : स्पेन यूरो २०२० को क्वार्टरफाइनलमा प्रवेश गरेको छ । निकै रोमाञ्चक खेलमा क्रोएसियलाई ५–३ गोलले हराउँदै स्पेनले अन्तिम ८ मा आफ्नो स्थान पक्का गरेको हो ।
युरो कपको इतिहासमा एकै खेलमा भएको यो दोस्रो ठूलो स्कोर हो । यसअघि सन् १९६० मा फ्रान्स र युगोस्लाभियाबीचको एकै खेलमा ९ गोल भएको थियो ।
खेलमा अग्रता भने क्रोएसियाले लिएको थियो । क्रोएसियामाथि स्पेनले सुरुदेखि दबाब बनाइरहेका बेला पेड्रीको ब्याकपासलाई गोलकिपरले नियन्त्रण गर्न नसक्दा स्पेनले आत्मघाती गोल गर्न पुगेको थियो ।
त्यसपछि भने स्पेनले गोल वर्षा गर्यो । पहिलो हाफको ३८ औँ मिनेटमा पाबलो साराबियाले बराबरी गोल फर्काए । दोस्रो हाफको शुरुवातमा नै सिजार एज्पेलिकुएटाले स्पेनलाई अग्रता दिलाए भने फेरान टोरेसले स्पेनको अग्रता दोब्बर बनाए ।
जीततर्फ अग्रसर स्पेनलाई मिस्लाभ ओरसिचले ८५ औँ मिनेटमा झट्का दिए । इन्जुरी समयमा मारियो पासालिचले गोल गर्दै खेल ३–३ को बराबरीमा ल्याए ।
निर्धारित समयमा खेल बराबरीमा सकिएपछि अतिरिक्त समय थपियो । अतिरिक्त समयको शुरुवातमा क्रोएसियाले स्पेनमा दबाब बनाउँदै गोलको अवसर सिर्जना गर्यो । त्यही बेला अल्भारो मोराटाले उत्कृष्ट गोल गर्दै स्पेनलाई पुनः अग्रता दिलाए । त्यसपछि मिकेल ओयारजाबालले अर्को गोल थप्दै स्पेनको जीत सुनिश्चित गरे ।
अब स्पेनले क्वार्टरफाइनलमा फ्रान्स र स्वीटजरल्याण्डबीचको विजेतासँग प्रतिस्पर्धा गर्नेछ ।
