निष्पक्ष र विश्वसनीय खबरको सँगालो 
Khabar Punja
१५ मंसिर २०८१, आईतवार
तनहुँ : विश्वकै दुर्लभ रोग स्पाइनल मस्कुलर एट्रोफीबाट ग्रसित ९ महिने बालकको उपचारका लागि रु ३१ लाख सङ्कलन भएको छ । तनहुँको शुक्लागण्डकी नगरपालिका–५ का मोहम्मद उस्मान अलीको उपचारका लागि हालसम्म उक्त रकम सङ्कलन भएको परिवारले जानकारी दिएको छ ।
बालकका बुबा मुबारक अलीले सहयोग जुट्ने क्रम जारी रहेको बताउँदै थप सहयोगको आवश्यकता रहेको बताए। “यो रोगको उपचार नेपालमा सम्भव रहेनछ, विदेश लैजानुपर्ने र यसका लागि रु २६ करोड भन्दा बढी खर्च हुने चिकित्सिकले बताएका छन्,” उनले भने । बालकको हाल काठमाडौस्थित बालमैत्री अस्पतालमा उपचार भइरहेको छ ।
बालकको उपचारका लागि जिल्लामा, देशका विभिन्न ठाउँमा र विदेशमा पनि रकम सङ्कलन भइरहेको छ । बालकको उपचारका लागि विभिन्न व्यक्तिले जन्मदिन मनाउँदा हुने फजुल खर्च सहयोग गरिरहेका छन् ।
ती बालकमा जन्मिएको तीन महिनामै एसएमए रोगको लक्षण देखिएको परिवारले जनाएको छ । उस्मानका परिवारले उनलाई तीन महिनादेखिनै पोखराका विभिन्न अस्पतालमा उपचार गराएर परीक्षण गर्दा रोगको पत्ता नलागेपछि ८ महिनाको उमेरमा कान्ति बाल अस्पताल लगेका थिए । उक्त अस्पतालमा उस्मानको उपचार बाल रोग विशेषज्ञ डा. बिना प्रजापतीको निरीक्षणमा भएको थियो ।
झण्डै २५÷३० परीक्षणपछि बिरामीको रगत परीक्षणका लागि भारत लाल पाथ पठाउँदा उस्मानलाई ‘स्पाइनल मस्कुलर एट्रोफी’ रोग लागेको पत्ता लागेको हो ।
