Khabar Punja

काठमाडाै । श्रम, रोजगार तथा सामाजिक सुरक्षामन्त्री कृष्णकुमार श्रेष्ठले श्रम क्षेत्रमा भएका विकृति सुधारका लागि आफूले महत्वपूर्ण काम गरेको बताएका छन् । मन्त्रालयमा सोमबार आयोजित विदाई समारोहलाई सम्बोधन गर्दै मन्त्री श्रेष्ठले आफूले गरेको कामको नम्बर जनताले दिने बताए ।

“मैले यति काम गरे भनेर आफैलाई नम्बर दिन्न, नम्बर त जनताले दिने हो,” श्रेष्ठले भने । ८ महिना २१ दिन मन्त्रीको रुपमा रहँदा शिर झुकाउने एउटा पनि काम नगरेको मन्त्री श्रेष्ठले बताए ।

श्रमिकले दुःख पाउने अवस्थाको अन्त्य गर्न आफू सधै क्रियाशील रहेको बताउँदै मन्त्री श्रेष्ठले ताहाचालमा भएका विकृति सुधारका लागि महत्वपूर्ण काम भएको बताए । श्रमिकलाई ठगेर विदेशमा बस्दा सुरक्षित हुन्छ भन्ने ठान्नेहरुलाई पनि कारवाहीको दायरामा ल्याउन सफल भइएको श्रेष्ठले बताए ।

मन्त्री श्रेष्ठले श्रमिक अस्पताल निर्माणको प्रक्रिया अगाडी बढेकाले त्यसले मूर्त रुप लिने बताए । श्रमिक अस्पताल निर्माणका लागि जितपुर सिमरा उपमहानगरपालिकामा पाँच विगाहा जग्गा पहिचान भइसकेको उनले उल्लेख गरे ।

आफूलाई मन्त्री पदमा टाँसिइरहन कुनै लोभलालच नरहेको बताउँदै उनले भने, “मन्त्री जोगाउन बालुवाटार, खुमलटार धायो भन्ने भ्रम पनि फैलाइयो, राजिनामा किन नदिएको पनि भनियो, राजिनामा दिनुपर्ने अपराध किसान श्रेष्ठले गरेको छैन ।”