निष्पक्ष र विश्वसनीय खबरको सँगालो 
Khabar Punja
२० चैत्र २०८१, शुक्रबार
दमाैली । गण्डकी प्रदेशका आन्तरिक मामिलामन्त्री डोवाटे विश्वकर्माले लागुऔषध दुव्र्यसन न्यूनीकरणका लागि वडा तहसम्मै सचेतना अभिवृद्धि गर्नुपर्नेमा जोड दिएका छन् ।
गण्डकी प्रदेश आन्तरिक मामिला मन्त्रालयले मङ्गलबार दमौलीमा आयोजना गरेको लागुऔषध दुव्र्यसन न्यूनीकरण सम्बन्धी अन्तरक्रिया तथा सचेतना कार्यक्रममा बोल्दै मन्त्री विश्वकर्माले लागुऔषधले समाजमा जरा गाडिसकेकाले यसको न्यूनीकरणका लागि वडातहसम्मै सचेतनाका कार्यक्रम लैजानुपर्ने बताए ।
पृथ्वीराजमार्गले छोएको तनहुँ जिल्ला लागुऔषध कारोवारको उच्च जोखिममा रहेकाले यसको नियन्त्रण सबैको साझा जिम्मेवारी रहेको मन्त्री विश्वकर्माले बताए। सङ्घ, प्रदेश, स्थानीय सरकारको साझा प्रयासबाट मात्रै लागुऔषध दुव्र्यसनको न्यूनीकरण सम्भव रहेको मन्त्री विश्वकर्माको भनाई थियो । “तनहुँ हुँदै विभिन्न जिल्ला जानुपर्ने हुँदा यो जिल्ला लागुऔषधको ट्रान्जिट प्वाइन्टको रुपमा विकास भइरहेको छ, यसलाई न्यूनीकरण गर्नेतर्फ सबै गम्भीर भएर लाग्नुपर्छ,” उनले भने ।
प्रदेश सरकारले लागुऔषध, आत्महत्या, छुवाछुत र महिला हिंसाका घटना न्यूनीकरणका लागि प्राथमिकता दिएर सचेतना कार्यक्रम सञ्चालन गरिरहेको उनले जानकारी दिए ।
गण्डकी प्रदेशसभा सदस्य सरिता गुरुङले लागुऔषध न्यूनीकरण एक्लैको प्रयासले मात्र सम्भव नभएकाले सबैको सामूहिक प्रयास आवश्यक रहेको बताइन् । जिल्ला समन्वय समितिका प्रमुख शान्तिरमण वाग्लेले सभ्य समाज निर्माणका लागि लागुऔषध न्यूनीकरण आवश्यक रहेको र यसका लागि नैतिक शिक्षाको खाँचो रहेको बताए ।
व्यास नगरपालिकाका प्रमुख वैकुण्ठ न्यौपानेले रणनीतिक रुपमा योजना बनाएर लागुऔषध न्यूनीकरण गर्न सकिने बताए। म्याग्दे गाउँपालिकाका अध्यक्ष श्रीप्रसाद श्रेष्ठले शिक्षक र विद्यार्थीको माध्यमबाट लागुऔषध दुव्र्यसन न्यूनीकरण प्रभावकारी हुने धारणा राखे ।
प्रमुख जिल्ला अधिकारी विश्वप्रकाश अर्यालले विद्यालय स्तरदेखि नै बालबालिकालाई लागुऔषध सम्बन्धी सचेतना प्रदान गर्न आवश्यक रहेको बताए। लागुऔषध कारोवार र प्रयोग गर्नेलाई पक्राउ गरी कानूनी दायरामा ल्याउँदा पनि यसको न्यूनीकरण हुन नसकेको उनकाे भनाई थियो ।
मन्त्रालयका उपसचिव यामप्रसाद सुवेदीले सामाजिक कुरिती विरुद्धको अभियान न्यूनीकरणका लागि प्रदेशका सबै जिल्लामा सचेतनामूलक कार्यक्रम सञ्चालन गरिएको जानकारी दिए।
कार्यक्रममा जिल्ला सरकारी वकिल कार्यालयका न्यायाधीवक्ता रामचन्द्र शर्माले सहजीकरण गरेका थिए । कार्यक्रममा जिल्लास्थित विद्यालयका शिक्षक, विद्यार्थीको सहभागिता थियो ।
