निष्पक्ष र विश्वसनीय खबरको सँगालो 
Khabar Punja
१४ चैत्र २०८१, शनिबार
दमौली । प्रधानमन्त्री कप छनोट क्रिकेट प्रतियोगिता अन्तर्गत नवलपुर विरुद्ध तनहुँले विजय हासिल गरेको छ । पोखरामा जारी गण्डकी प्रदेशस्तरीय छनोट प्रतियोगिता अन्तर्गत शनिबार भएको खेलमा नवलपुर विरुद्ध तनहुँ दुई विकेटले विजयी भएको हो ।
टस जितेर पहिले व्याटिङ गरेको नवलपुरले ४४ ओभरमा दश विकेट गुमाएर एक सय ७० रन बनाएको थियो । लक्ष्य पछ्याउने क्रममा तनहुँले आठ विकेट गुमाएर उक्त लक्ष्य पूरा गरेको छ ।
तनहुँको जितका लागि कप्तान चन्द्रकान्त पौडेलले दुई छक्का र चार चौकाको सहयोगले २७ रन बनाए तनहुँका लागि सचिन अधिकारीले ३० र उत्सव श्रेष्ठले २८ रन बनाएका थिए । त्यस्तै तनहुँकै विनय भण्डारीले तीन, दिनेश बूढा मगर र सन्दिप पराजुलीले दुई÷दुई र चन्द्रकान्त पौडेलले एक विकेट लिएका थिए।
उक्त खेलमा कप्तान चन्द्रकान्त पौडेल म्यान अफ दि म्याच घोषित भएका छन् ।
“तनहुँ क्रिकेट सङ्घको हौसला र खेलाडीको सामूहिक प्रयासले तनहुँको टिमले खेल जित्न सक्यो,” विजयपछि कप्तान पौडेलले भने ।
छनोट खेलमा लगातार तीन खेल जित्दै तनहुँको टिम प्रधानमन्त्री कप क्रिकेट छनोटको विजेता घोषित हुन सफल भएको छ । यद्यपि छनोट खेलका दुई खेल भोलि र पर्सी बाँकी छ । आइतबार स्याङ्जा र नवलपुर तथा सोमबार स्याङ्जा र कास्कीबीच खेल हुनेछ ।
तनहुँले विगत केही दुई वर्ष यता लगातार आठ खेल हारेको थियो । क्रिकेट सङ्घले मान्यता दिएको तनहुँ सहित नवलपुर, स्याङ्जा र कास्कीसँग तनहुँले खेल हारेका थियो । तनहुँले यसअघि कास्की र स्याङ्जालाई पराजित गरेको थियो । तनहुँले कास्कीमाथि पहिलो पटक विजय हासिल गरेको थियो ।
