Khabar Punja

दमौली । रोटर्याक्ट डिष्ट्रिक ३३९२ को आयोजना तथा रोटर्याक्ट क्लव दमौलीसहित विभिन्न क्लवको व्यवस्थापनमा दमौलीमा दोस्रो पिएस मिट तथा पेट्स सेट्स कार्यक्रम शनिबार सम्पन्न भएको छ ।

रोटर्याक्ट क्लब अफ दमौलीसहित रोटर्याक्ट क्लब अफ बज्र मनास्लु, गोरखा र स्यम्बु भैसीपाटीको आयोजना र रोटर्याक्ट क्लब अफ भिमाद, मणिग्राम, कान्तिपुर र वीरगञ्ज मेट्रोपोलिसको सहआयोजनामा कार्यक्रम गरिएको हो।

कार्यक्रममादेशभरका एक सय ८० रोटर्याक्ट क्लबका अध्यक्ष, सचिव तथा सदस्य गरी सात सयभन्दा बढीको सहभागिता रहेको रोटर्याक्ट क्लव दमौलीका अध्यक्ष विशाल श्रेष्ठले जानकारी दिए ।

यसअघि कार्यक्रमको उदघाटन गर्दै नेपाली कांग्रेसका केन्द्रीय सदस्य एवं काठमाडौँ–५ का प्रतिनिधिसभा सदस्य प्रदीप पौडेलले देश बनाउने जिम्मेवारी युवाको भएको बताए । ”देश आजको अवस्थामा आइपुग्नुमा युवाको ठूलो भूमिका छ, देशको थप विकासका लागि पनि युवा अग्रसर हुनुपर्छ”, पौडेलले भने, “युवाहरू देश बनाउने सोच र सङ्कल्प लिएर हिँड्नुपर्छ ।”

पौडेलले सामाजिक सङ्घसंस्थाले युवालाई नेतृत्व गर्न सिकाएको भन्दै नेतृत्व लिनका लागि युवाहरू पनि जागरुक बन्नुपर्ने धारणा राखे । “रोटरी, लायन्सजस्ता क्लबहरूले युवालाई नेतृत्वमा पुग्न सहयोग पुर्याएको छ, युवालाई एकजुट पनि बनाएको छ”, पौडेलले भने, “यस्ता क्लबले लोकतन्त्रको अभ्यास गर्न सिकाएको छ ।”