Khabar Punja

दमाैली । तनहुँ दमौलीमा अवस्थित बैङ्क तथा वित्तीय संस्थाले धितो लिलाम गर्दा कानुनी प्रक्रिया अनुसार पारदर्शी रुपले सूचना जारी गर्ने प्रतिबद्धता जनाएका छन् । जिल्ला प्रशासन कार्यालय तनहुँद्वारा मङ्गलबार प्रशासन कार्यालयमा आयोजित छलफलमा सहभागी बैङ्क तथा वित्तीय संस्थाका प्रबन्धकहरुले धितो लिलाम गर्दा कानुनी प्रक्रिया अनुसार पारदर्शी रुपले सूचना जारी गर्ने प्रतिबद्धता जनाएका हुन् ।

प्रमुख जिल्ला अधिकारी श्यामकृष्ण थापाको अध्यक्षतामा आयोजित छलफलका क्रममा धितो लिलाम गर्दा तोकिएको म्याद उपलब्ध गराउने, न्यून रकममा लिलाम गर्नुपर्दाको अवस्था विश्लेषण गर्ने, धितो मूल्याङ्कन गर्दा कुनै कमजोरी भएमा आवश्यक कारवाही समेत गर्ने र ऋणीको कानुनी हक सुरक्षित गर्ने निर्णय भएको छ ।

त्यस्तै घर जग्गा खाली गराउने सन्दर्भमा कानुनमा भएको व्यवस्था अनुसार आवश्यक सुरक्षा व्यवस्था जिल्ला प्रशासन कार्यालय तनहुँले मिलाउने निर्णय भएको छ ।

बैङ्क तथा वित्तीय संस्थाहरुले ऋणीको धितो लिलाम गर्दा सूचना समयमा प्राप्त नगरेको, ऋण चुक्ता गर्न समय थप नदिएको तथा ऋण लिँदाको समयमा भन्दा लिलाम गर्दा एकदमै कम दरमा लिलाम गरिदिएको गुनासो आएपछि प्रशासनले त्यसका लागि आवश्यक छलफल गराएको हो ।

छलफलका क्रममा सहायक प्रमुख जिल्ला अधिकारी जितबहादुर भण्डारी, सिटीजन्स बैङ्कका प्रमुख श्यामहरि तिवारी, गरिमा विकास बैङ्का प्रबन्धक सुमित बस्नेत, नेपाल एसविआइ बैङ्कका कर्जा अधिकृत रामशरण त्रिपाठी, नविल बैङ्कका प्रबन्धक नारायण भट्ट, हिमालयन बैङ्कका प्रमुख रुद्रजङ्ग गुरुङ, कुमारी बैङ्कका प्रमुख चिरञ्जीवि शर्मा, मालपोत अधिकृत खेमबहादुर खत्री लगायतको सहभागिता थियो ।