Khabar Punja

२०५२ साल फागुन १ गतेदेखि सुरु भएको दश वर्षे जनयुद्ध नेपाली इतिहासमा मात्र नभई विश्व राजनीतिक आन्दोलनमा पनि गहिरो प्रभाव पार्ने जनक्रान्तिको ऐतिहासिक दस्तावेज हो। नेपाली जनताले सामन्ती राजतन्त्र, वर्गीय शोषण, जातीय, लैङ्गिक, र क्षेत्रीय विभेदका विरुद्ध उठाएको यो सशस्त्र संघर्षले नेपालको राजनीतिक, सामाजिक, र संरचनात्मक संरचनामा आमूल परिवर्तन ल्याएको छ। जनयुद्धको मूख्य ध्येय वर्गविहीन, जातीय समानतायुक्त, संघीय लोकतान्त्रिक गणतन्त्र स्थापना गर्नु थियो। सशस्त्र संघर्षलाई शान्तिपूर्ण राजनीतिक प्रक्रियामा रूपान्तरण गर्दै २०६३ को ऐतिहासिक १२ बुँदे समझदारी, २०६४ को संविधानसभा निर्वाचन, र अन्ततः २०६५ सालमा गणतन्त्र घोषणा हुनु — यी सबै चरणहरू क्रान्तिको निरन्तरता थिए।

गणतन्त्र दिवस आज मात्र एउटा उत्सव होइन, यो जनताको त्याग, बलिदान र परिवर्तनको चाहनाको मान्यता हो। यो दिवसले हामीलाई सम्झाउँछ — राजा होइन, जनता सर्वोच्च हुन्। अब शासन सिंहदरबारमा होइन, जनताको घरदैलोमै पुग्नुपर्छ भन्ने जनआकांक्षाको प्रतिबिम्ब हो। हामी माओवादी केन्द्रका कार्यकर्ताहरू, खासगरी गण्डकी प्रदेश र तनहुँ जिल्लामा, यो इतिहासको साक्षी मात्र होइन, यो परिवर्तनका अग्रदूत पनि हौं। जनयुद्धमा होमिएका सहिदहरू, बेपत्ता योद्धाहरू, र सम्पूर्ण योगदान दिने योद्धाहरूको सपना साकार पार्न हाम्रो जिम्मेवारी अझै बाँकी छ।

आज हामीले लोकतान्त्रिक गणतन्त्रको संरक्षण गर्नुपर्छ, संविधानको मर्मअनुसार सामाजिक न्याय, समावेशीता र आर्थिक रुपान्तरणलाई सुनिश्चित गर्नुपर्छ। जनतासँगको सम्बन्ध अझ गहिरो बनाउँदै पार्टीलाई जनजिवनसँग जोड्ने अभियान हाम्रो प्रमुख कर्तव्य हो। यस अवसरमा, सम्पूर्ण सहिदहरूप्रति श्रद्धाञ्जली, बेपत्ताहरूप्रति सम्मान, र सम्पूर्ण क्रान्तिकारी योद्धाहरूप्रति उच्च कदर व्यक्त गर्दछु।