निष्पक्ष र विश्वसनीय खबरको सँगालो 
Khabar Punja
१ पुष २०८२, बुधबार
एजेन्सी, २९ मङ्सिर । अष्ट्रेलियाको सिड्नीस्थित बोन्डाइ बीचमा भएको गोलीकाण्डमा कम्तीमा १५ जनाको मृत्यु भएको छ भने ३८ जना घाइते भएका छन् । घाइतेको अस्पतालमा उपचार भइरहेको छ ।
न्यू साउथ वेल्स प्रहरीले आइतबार भएको घटनालाई आतंकवादी आक्रमणका रूपमा अनुसन्धान गरिरहेको जनाएको छ ।
गोलीकाण्ड यहूदी समुदायलाई लक्षित गरी गरिएको प्रहरीले जनाएको छ । यहूदी पर्व हानुक्काको पहिलो दिन मनाउन सयौं मानिस भेला भएको बेला आक्रमण भएको थियो ।
मृतकमध्ये एक जना होलोकस्टबाट बाँचेका वृद्ध रहेको र उनले गोली लाग्दाखेरी आफ्नी श्रीमतीलाई जोगाउने प्रयास गरेका थिए ।
प्रहरीका अनुसार आक्रमणमा संलग्न व्यक्ति बुबा–छोरा हुन् । घटनास्थलमै ५० वर्षीय बुबाको मृत्यु भएको छ भने २४ वर्षीय छोरा गम्भीर तर स्थिर अवस्थामा अस्पतालमा उपचाररत छन् ।
५० वर्षीय व्यक्ति गन क्लबका सदस्य रहेको र उनीसँग लामो बन्दुक प्रयोगको वैध अनुमति रहेको प्रहरीले जनाएको छ । घटनासँग सम्बन्धित भएर सिड्नीस्थित एक घरमा छापा मारिएको छ ।
