निष्पक्ष र विश्वसनीय खबरको सँगालो 
Khabar Punja
५ आश्विन २०८३, मंगलवार
दमौली, ६ असोज । रसुवाको भोटेकोशीमा आएको बाढीमा परी २७ दिनदेखि बेपत्ता नेपाली सेनामा कार्यरत तनहुँकी कृति कुमालको परिवारले अन्ततः कुशको शव बनाएर अन्तिम संस्कार गरेको छ ।
व्यास नगरपालिका–५ निवासी कुमाल रसुवाको टिमुरेस्थित श्रीनाथ गणमा सिपाही पदमा कार्यरत थिइन् । भोटेकोशीमा आएको बाढीपछि बेपत्ता भएकी उनकाे खोजीका लागि निरन्तर प्रयास गरिए पनि हालसम्म अवस्था पत्ता लाग्न नसकेपछि परिवारले आज व्यास नगरपालिका–५ स्थित ८८पाटन घाटमा कुशको शव बनाएर दाहसंस्कार गरेको हो ।
विसं २०६२ असोज ३० गते जन्मिएकी कुमाल विसं २०८१ मा नेपाली सेनामा भर्ती भएकी थिइन् । नेपाली सेनामा सेवा सुरु गरेपछि उउनी रसुवाको टिमुरेमा रहेको श्रीनाथ गणमा कार्यरत थिइन् ।
भोटेकोशीमा आएको बाढीपछि कुमाल बेपत्ता भएकी थिइन् । बाढीमा बेपत्ता भएपछि परिवारजन तथा सुरक्षाकर्मीले उनकाे खोजीलाई निरन्तरता दिएका थिए । विभिन्न स्थानमा खोजी गरिए पनि २७ दिनसम्म उहाँको अवस्थाबारे कुनै जानकारी प्राप्त हुन सकेन ।
समय बित्दै जाँदा शव भेटिने सम्भावना न्यून हुँदै गएपछि परिवारले अन्ततः धार्मिक तथा सामाजिक परम्पराअनुसार कुशको शव बनाएर अन्तिम संस्कार गर्ने निर्णय गरेको हो ।
स्वर्गीय कुमालका पिता अमर कुमालले छोरीको शव भेटिने आश हुँदाहुँदै पनि लामो समयसम्म खोजी गर्दा कुनै जानकारी प्राप्त नभएपछि परिवार, आफन्त तथा शुभेच्छुकको सल्लाहमा कुशको शव बनाएर दाहसंस्कार गरिएको बताए ।
छोरीको वास्तविक शव फेला नपरे पनि अन्तिम संस्कार गर्नुपर्ने बाध्यताले परिवार भावविह्वल बनेको थियो । छोरीको अवस्था थाहा पाउने आशमा २७ दिनसम्म पर्खिए पनि कुनै खबर नआएपछि भारी मनले अन्तिम संस्कार गर्नुपरेको उनले बताए ।
कुमालको अन्तिम संस्कारअघि व्यास नगरपालिका–५ चापाघाटस्थित कालीभञ्जन गण (इ) बाट नेपाली सेनाको टुकुडी पाटन घाट पुगेको थियो । सेनाको टोलीले स्वर्गीय कुमालप्रति शोक सम्मान व्यक्त गरेको थियो ।
नेपाली सेनामा कार्यरत रहँदा कुमालले निर्वाह गर्नुभएको सेवाको सम्मानस्वरूप सेनाको टोलीले अन्तिम श्रद्धाञ्जली अर्पण गरेको थियो । त्यसपछि उनका हजुरबुबा गुरुबहादुर कुमालले कुशको शवमा दागबत्ती दिएका थिए ।
कुमालको अन्तिम संस्कारमा परिवारका सदस्य, आफन्तजन, नेपाली सेनाका प्रतिनिधि तथा स्थानीयवासीको उपस्थिति थियो । पाटन घाटमा भएको अन्तिम संस्कारको दृश्यले उपस्थित सबैलाई भावुक बनाएको थियो । परिवारका लागि छोरीको शवसमेत नदेखी अन्तिम संस्कार गर्नुपर्ने अवस्था थप पीडादायी बनेको छ ।
