निष्पक्ष र विश्वसनीय खबरको सँगालो 
Khabar Punja
१ मंसिर २०८१, आईतवार
दमाैली । तनहुँको बन्दीपुर गाउँपालिका–१ पिप्लेबाट गोली र लागुऔषध सहित तीन जना पक्राउ परेका छन् ।
पक्राउ पर्नेमा बन्दीपुर गाउँपालिका–४ भैसीखाँ बस्ने २१ वर्षीय मनबहादुर गुरुङ, सोही वडाको चान्चा बस्ने ३० वर्षीय आशिष कायस्थ र भानु नगरपालिका–१ शुक्रखोला बस्ने ३० वर्षीय भरत तामाङ रहेको जिल्ला प्रहरी कार्यालय तनहुँले जनाएको छ ।
प्रहरीले भरत तामाङको घरबाट ७.६२ एमएफएस २००१ लेखिएको राइफलमा प्रयोग हुने हतियारको गोली र अन्य दुई जनाको साथबाट लागुऔषध बरामद गरेको प्रहरी निरीक्षक नरहरि अधिकारीले जानकारी दिए। प्रहरीले भरतको घर खानतलासी गर्दा दुई थान हतियारको गोली बरामद गरेको छ । त्यस्तै निजकै घरबाट एक एम्पुल नुफिन, एक एम्पुल डाइजेपाम, एक एम्पुल फेनरागन, चार थान सिरिन्ज बरामद गरेको छ ।
यसैगरी मनबहादुरको साथबाट नुफिन १७ एम्पुल, डाइजेपाम १७ एम्पुल र फेनरागन१७ एम्पुल लागुऔषध बरामद भएको छ । आशिषको साथबाट नुफिन दुई एम्पुल, डाइजेपाम दुई एम्पुल र फेनरागन दुई एम्पुल बरामद भएको छ । पक्राउ परेकामध्ये भरत लागुऔषध विक्री वितरणमा संलग्न रहेको खुलेको छ ।
पक्राउ परेका तीन जना विरुद्ध अदालतबाट म्याद थप गरी अनुसन्धान भइरहेको प्रहरीले जनाएको छ ।
