निष्पक्ष र विश्वसनीय खबरको सँगालो 
Khabar Punja
२२ बैशाख २०८१, शनिबार
काठमाडौ । नेकपा (एकीकृत समाजवादी)ले पहिलो चरणमा प्रकाश ज्वालालाई सरकारमा पठाउने निर्णय गरेको छ।
बुधबार बसेको केन्द्रीय सचिवालय बैठकले ज्वालालाई सरकारमा पठाउने निर्णय गरेको एकीकृत समाजवादीका वरिष्ठ नेता झलनाथ खनालले बताए। बैठकपछि सञ्चारकर्मीसँग संक्षिप्त कुराकानी गर्दै खनालले भने, “आज प्रकाश ज्वालालाई पठाउने निर्णय भएको छ। थप मन्त्रीका विषयमा पछि निर्णय हुनेछ।”
ज्वाला एकीकृत समाजवादीका उपमहासचिव हुन्। गत मंसीर ४ गते भएको प्रतिनिधि सभा सदस्यको निर्वाचनमा उनी सल्यानबाट निर्वाचित भएका थिए।
प्रधानमन्त्री पुष्पकमल दाहालले एकीकृत समाजवादीलाई दुई मन्त्रालय दिने प्रस्ताव गरेका छन्। एकीकृत समाजवादीले भने तीन मन्त्रालय माग गरेको छ।
अहिले मन्त्रिपरिषद् विस्तार गर्न एक मन्त्रीको नाम पठाउन प्रधानमन्त्री दाहालले अध्यक्ष माधवकुमार नेपालसँग आग्रह गरेका थिए। त्यसैका आधारमा केन्द्रीय सचिवालयको आकस्मिक बैठक बोलाएर निर्णय गरिएको खनालले जानकारी दिए।
