Khabar Punja

दमौली ।नेकपा एमालेका अध्यक्ष केपी ओलीले तनहुँ-१ का उम्मेदवार सर्वेन्द्र खनाललाई शुभकामना दिएका छन् । ओलीले खनालको तस्वीर सामाजिक सञ्जालमार्फत् शेयर गर्दै शुभकामना दिएका छन् ।

उनले आफू तनहुँ आउने बताएका छन् । ओलीको उपस्थितिमा वैशाख ५ गते दमौलीमा चुनावी सभा हुँदैछ ।

उनले भनेका छन्, ‘तनहुँ भन्नासाथ म बन्दीपुरबाट देखिने रमाइला दृश्यहरु सम्झन्छु। सम्झँदा पनि मन आनन्दित हुन्छ । तनहुँ–१ मा वैशाख १० गते हुने उप–चुनावको प्रचार अभियानलाई मैले नियालीरहेको छु । नेकपा (एमाले)का सर्वेन्द्र खनाल सहित अरु उम्मेदवार चुनावी मैदानमा हुनुहुन्छ । मलाई लाग्छ – तनहुँलाई कस्तो बनाउने भन्ने विषयमा उम्मेदवारहरुले ‘इमोसनल’ कुरा भन्दा पनि आफ्ना एजेण्डाहरु मतदाताहरुलाई वताउन् । मैले हाम्रो पार्टीका उम्मेदवार सर्वेन्द्रजीलाई पनि भनेको छु– यो केही दिन हल्लाखल्ला गर्ने र चुनाव जित्ने विषय मात्रै भयो भने त्यसले जनतालाई फाइदा गर्दैन । तसर्थ हामी आफ्नो कुरा गर्ने भन्दा धेरै जनताका कुरा सुनौं, धेरै भन्दा धेरै युवा मतदाताको सहभागितामा रचनात्मक कार्यक्रमहरु गरौं । समय मिल्यो भने सुन्दर तनहुँ घुम्न म फेरि पनि आउँछु है ।’