निष्पक्ष र विश्वसनीय खबरको सँगालो 
Khabar Punja
१९ चैत्र २०८१, बिहीबार
दमाैली । तनहुँको शुक्लागण्डकी नगरपालिका–५ बेलचौतारामा जारी शुक्लागण्डकी महोत्सवमा सञ्चालित गण्डकी प्रदेश स्तरीय भलिबल प्रतियोगितामा आइतबारका खेलमा तनहुँको शुक्लागण्डकी नगरपालिका, स्याङ्जाको हरिनास गाउँपालिका र नवलपुरको बौदीकाली गाउँपालिका विजयी भएको छ ।
पहिलो खेलमा घिरिङलाई ३–० को सोझो सेटमा पराजित गर्दै स्याङ्जाको हरिनास विजयी भएको हो ।
दोस्रो खेलमा नवलपुरको बौदीकालीले तनहुँको ऋषिङ गाउँपालिकालाई ३–० सेटमा पराजित गर्दै अघिल्लो चरणमा प्रवेश गरेकोे खेल व्यवस्थापन समिति संयोजक अमृत घिमिरेले जानकारी दिए।
अन्तिम खेलमा शुक्लागण्डकी ‘ए’ ले कास्कीको मादी गाउँपालिकालाई ३–१ सेटले पराजित गर्यो । घिमिरेका अनुसार पहिलो चरणका खेल सकिएका छन् ।
प्रतियोगितामा प्रथम हुने समूहले नगद रु दुई लाख, द्वितीयले रु एक लाख, तृतीयले रु ५० हजार र सान्त्वना हुनेले रु २५ हजार साथमा ट्रफी, मेडल र प्रमाणपत्र पाउने संयोजक घिमिरले बताए। प्रतियोगितामा १३ समुहको सहभागिता रहेको छ ।
प्रतियोगितामा उत्कृष्ट खेलाडी, स्पाईकर, सेटर, डिफेन्डर, ब्लकर, कोच र सर्भरलाई पनि पुरस्कार प्रदान गरिने आयोजकले जनाएको छ ।
शुक्लागण्डकी नगर उद्योग वाणिज्य सङ्घले आयोजना गरेको महोत्सव फागुन २० गतेसम्म सञ्चालन हुनेछ । आर्थिक समाजिक खेलकुदको विकास, कृषि तथा पर्यटनको प्रबद्र्धन, शुक्लागण्डकी महोत्सव कला सीप र संस्कृतिको संरक्षण भन्ने मूल नाराका साथ जारी महोत्सवमा विभिन्न जातजातिका सांस्कृतिक एवम् झाँकी प्रदर्शनी, तीनखोलेदेवी, ढोरवाराही मन्दिर दर्शन, रकगार्डेन, दगाम, भूजिकोट भ्यू टावर, भुमे भैरव मन्दिर तथा ऐतिहासिक स्थानथोक दरवार अवलोकन एवम् मिलेनियम ट्रेक पदयात्रालाई निरन्तरता दिइएको छ ।
महोत्सवमा रत्यौली प्रतियोगिता, कौरा नृत्य, विद्यालयस्तरीय खुला नृत्य प्रतियोगिता समेत समावेश गरिएको छ । महोत्सव अवधिभर दुई लाख दर्शकको सहभागिता र करिब रु पाँच करोड बराबरको कारोवार हुने महोत्सव संयोजक समुन्द्रराम श्रेष्ठले जानकारी दिए।
