निष्पक्ष र विश्वसनीय खबरको सँगालो 
Khabar Punja
२० मंसिर २०८२, शनिबार
काठमाडाैं, ३१ असाेज । नेपाल विद्यार्थी संघ केन्द्रीय कार्यसमितिका सदस्यहरूले नेपाली कांग्रेस केन्द्रीय कार्यसमितिसमक्ष ६ बुँदे माग राखेका छन् ।
बिहीबार सानेपास्थित पार्टी कार्यालयमा नेपाल विद्यार्थी संघ (नेविसंघ) केन्द्रीय कार्यसमितिका सदस्यहरूले कार्यवाहक सभापति पूर्णबहादुर खड्कालाई आफ्ना ६ बुँदे मागपत्र बुझाएका हुन् ।
जेनजी आन्दोलन र जनलहरको भावनालाई कदर गर्दै संस्थागत रूपमा निर्णय गरी आफूलाई परिमार्जित गर्दै अगाडि बढ्न केन्द्रीय सदस्यहरूले माग राखेका छन् ।
नेपाल विद्यार्थी संघको प्रस्तावित विधान परिमार्जनसहित नेविसंघ केन्द्रीय कार्यसमितिलाई हस्तान्तरण गरिनुपर्ने र विधान बमोजिम अधिवेशनका सुनिश्चितता गरिनुपर्ने विशेष मागसहित कार्यवाहक सभापतिलाई मागपत्र बुझाएको नेविसंघ केन्द्रीय सदस्य एवं विधान समितिका सदस्य राजेश कुमार श्रेष्ठले बताए ।
वर्तमान समयमा देखापरिरहेको निराशा, अलमल र राजनीतिक वितृष्णाले जेनजी आन्दोलनको अवस्था सिर्जना गरेको भन्ने कुरा बुझ्नुपर्ने श्रेष्ठको भनाइ छ ।
अबका दिनमा नेपाली कांग्रेसमा युवाहरूको आकर्षण र भरोसाका पार्टी बनाइ आमजनतामा नेपाली कांग्रेसले विश्वास जित्नुपर्ने आवश्यकता रहेको समेत उनले बताएका छन् ।
त्यस्तै, युवाहरूलाई नेपाली कांग्रेस केन्द्रीय कार्यसमितिमा समावेश गराइ जेनजी आन्दोलनको मर्मलाई संस्थागत रूपमा नै समावेश गर्नुपर्ने समेत माग राखेका छन् ।
विद्यार्थीहरूको आवाजलाई बेवास्ता गरिएमा चरणबद्ध र सशक्त रूपमा आन्दोलनमा नै उत्रन बाध्य हुने श्रेष्ठले बताए । यसका साथै आन्दोलनको सम्पूर्ण जिम्मेवारी स्वयं पार्टीका पदाधिकारीले बहन गर्नुपर्ने उनको भनाइ छ ।
यस्ता छन् केन्द्रीय कार्यसमितिसमक्ष राखेका माग:
– नेपाल विद्यार्थी संघको प्रस्तावित विधान परिमार्जनसहित नेविसंघ केन्द्रीय कार्यसमितिलाई हस्तान्तरण गरिनुपर्ने र विधान बमोजिम अधिवेशनका सुनिश्चितता गरिनुपर्ने ।
– पार्टीको तर्फबाट अवसर पाएका र लाभको पद धारण गरेका विभिन्न तह र तप्कामा रहेका सबैको सम्पत्ति विवरण बुझाउनुपर्ने र शंकास्पद व्यक्तिहरूको छानबिन गरिनुपर्ने ।
– नेपाली कांग्रेसको केन्द्रीय कार्यसमितिमा युवाहरूको सम्मानजनक उपस्थितिको सुनिश्चितता गरिनुपर्ने ।
– आम निर्वाचनमा ४० प्रतिशत युवाहरूको उम्मेदवारी सुनिश्चित गरिनुपर्ने ।
– जेनजी पुस्ताको माग र आन्दोलनको मर्म संस्थागत गर्दै पार्टीको विभिन्न तहमा जेनजी समूहको सहभागिता सुनिश्चित गरिनुपर्ने । ६० नेपाली कांग्रेसको केन्द्रीय कार्यसमितिको प्रत्येक जिम्मेवारीमा रहनु भएका नेतृत्व पदेन महाधिवेशन प्रतिनिधि नरहने व्यवस्था सुनिश्चित गरिनु पर्ने ।
