निष्पक्ष र विश्वसनीय खबरको सँगालो 
Khabar Punja
१५ माघ २०८२, बिहीबार
काठमाडौँ, १५ माघ । यूईएफए च्याम्पियन्स लिग अन्तर्गत नेपाली समयअनुसार बिहीबार सम्पन्न खेलमा बार्सिलोनाले उत्कृष्ट पुनरागमन गर्दै कोपेनहेगनलाई ४–१ ले पराजित गरेको छ । सुरुवातमै गोल खाएर पछि परेको बार्सिलोनाले दोस्रो हाफमा आक्रामक प्रदर्शन गर्दै खेल आफ्नो पक्षमा पार्न सफल भयो ।
खेलको चौथो मिनेटमै कोपेनहेगनका भिक्टर डादासनले गोल गर्दै पाहुना टोलीलाई अग्रता दिलाएका थिए । पहिलो हाफमा बराबरी गोल गर्न नसकेको बार्सिलोना दोस्रो हाफमा भने पूर्ण रूपमा रूपान्तरित देखियो ।
४८ औँ मिनेटमा रोबर्ट लेवान्डोस्कीले बराबरी गोल गर्दै टोलीलाई खेलमा फर्काए । त्यसपछि ६०औँ मिनेटमा युवा स्टार लामिन यामालले शानदार गोल गर्दै बार्सिलोनालाई अग्रता दिलाए । ६९औँ मिनेटमा राफिन्हाले पेनाल्टीमार्फत गोल गर्दै अग्रता अझ फराकिलो बनाए भने ८५औँ मिनेटमा मार्कस रासफोर्डले गोल गर्दै बार्सिलोनाको जित सुनिश्चित गरे ।
यस जितसँगै बार्सिलोनाले ८ खेलबाट १६ अंक जोडेको छ ।
