निष्पक्ष र विश्वसनीय खबरको सँगालो 
Khabar Punja
२८ बैशाख २०८३, मंगलवार
दमौली, २९ वैशाख । तनहुँको आँबुखैरेनी गाउँपालिका–२ खानीखोला स्थित पृथ्वी राजमार्ग सडकखण्डमा मोटरसाइकल दुर्घटना हुँदा चालकको साथबाट लागुऔषधजन्य औषधि ट्रामाडोल फेला परेको छ।
साेमबार करिब ११ बजे आँबुखैरेनीबाट डुम्रेतर्फ जाँदै गरेको बा ६२ प ७१०६ नम्बरको मोटरसाइकल आफैं अनियन्त्रित भई दुर्घटना भएको थियो। दुर्घटनामा मोटरसाइकल चालक गोरखा नगरपालिका–१३ तीनकिलो निवासी २५ वर्षीय अर्जुन आले सकुशल रहेका छन्। उनलाई कुनै चोटपटक नलागेको र अस्पताल लैजानु नपर्ने प्रहरीले जनाएको छ।
प्रहरीका अनुसार चालकले लागुऔषध सेवन गरेको आशंकामा चेकजाँच गर्दा उनको साथबाट ट्रामाडोल १९ क्याप्सुल फेला परेको हो।
मोटरसाइकल र चालकलाई थप अनुसन्धानका लागि इलाका प्रहरी कार्यालय आँबुखैरेनी, तनहुँमा राखिएको प्रहरी नायब उपरिक्षक श्रवणकुमार विकले जानकारी दिए ।
