निष्पक्ष र विश्वसनीय खबरको सँगालो 
Khabar Punja
५ माघ २०८१, आईतवार
तनहुँ : सशुल्क रुपमा कोरोना परीक्षणका लागि अब पोखरा वा चितवन जान नपर्ने भएको छ । दमौलीस्थित नेशनल एपोलो अस्पतालमा स्वाब सङ्कलन शुरु हुने भएपछि पैसा तिरेर कोरोना परीक्षणका लागि अन्यत्र जान नपर्ने भएको हो ।
एपोलो अस्पतालले मङ्गलबारदेखि अस्पताल परिसरमै स्वाब सङ्कलनको व्यवस्था मिलाउन लागेको सञ्चालक चुडामणि दाहालले जानकारी दिनुभयो । उहॉका अनुसार प्रत्येक हप्ताको मङ्गलबार स्वाब सङ्कलनको व्यवस्था मिलाइनेछ ।
“सङ्कलन गरिएको स्वाब नेपाल सरकारबाट मान्यताप्राप्त ल्याबमा परीक्षण गरिनेछ,” उहॉले भन्नुभयो, “जिल्लामै स्वाब सङ्कलनको व्यवस्था भएपछि पोखरा र चितवन जानुपर्ने बाध्यता हट्नेछ ।” दाहालका अनुसार सङ्कलन गरिएको स्वाबको रिपोर्ट एकदिनमै उपलब्ध गराइनेछ । “अत्यन्तै जरुरी भएकाहरुलाई आजको आजै पनि रिपोर्ट दिने व्यवस्था मिलाउनेछौ,” उहॉले भन्नुभयो ।
दश जना भन्दा बढी भएको खण्डमा अस्पतालले सम्बन्धित ठाउँमा र जुनसुकै दिनमा पनि स्वाब सङ्कलनको व्यवस्था मिलाउने दाहालले जानकारी दिनुभयो ।
